Wat la pynthut u slap ïashim bynta palat 42 ngut ha ka rynsan siat suloi

Ïa kane ka jingïakob yn pynkut ha ka 2 tarik u Naitung ha katei kajuh ka jaka.

Shillong, Jylliew 29:

Ka Shooting Association of Meghalaya ka la sdang ïa ka rynsan ïakob siat suloi ba la tip kum ka 8th Meghalaya State Shooting Championship 2023 ha ka sngi Palei ha Assam Regimental Center.

       Ka jingthmu jong kane ka jingïakob ka long shi bynta ban jied ïa ki nongïalehkai kiba kynsai ki ban mihkhmat ïa ka Jylla sha ki lympung ïakob ki ban sa long shen ha kylleng jong ka ri (National Level).

       Ha kane ka sngi wat la ka don ka jingpynthut u slap, hynrei ki nongïashim bynta kiba la wan sha kane ka jingïakob ki la don palat 42 ngut ki ban shim bynta ha ki jingïakob siat bapher bapher kum ka 10M (indoor) Air pistol/Air Rifle, 25M Standard Pistol bad 50M Rifle hapoh ka jingkhmih bniah da u Rituraj Bhagawati (ISSF) uba long u nongbishar na Delhi.

Ïa kane ka jingïakob yn pynkut ha ka 2 tarik u Naitung ha katei kajuh ka jaka.