Shillong, Jylliew 29:
Ka Assam Rifles Public School bad ka Umphyrnai Presbyterian SS ki la jam sha ka final ha ka kyrdan ïalehkai U-14 lympung ïalehkai District Level Subroto Mukherjee Football Cup ba la pynïaid da ka shlem treikam u District Sports Officer East Khasi Hill hadien ba ki khur jingjop ha ka Sngi Palei.
Ha ka jingïakhun semi final kaba la long ha madan Heh kaba ha Mawlai Phudmuri, ka Assam Rifles ka la pynliem noh ïa ka kynhun ki shiphew ngut ki rangïalehkai ka Sacred Heart Boys SS da 4-0 kol.
Kumba ka paw na kane ka jingïakhun baroh ar kynhun ki la ïakhun tyngeh naduh kaba sdang ha kaba ki la ïoh ïa ki katto katne ki kabu kiba biang. Ka Assam Rifles ka la ïoh ban pynkhih jar nyngkong eh lyngba ka penalty ba la shut da u Medonbanshan Kurkalang ha ka minit kaba 20 na ka bynta ban tam shi kol haduh ba kut ka kylla step.
Hadien katto katne por ba la bteng biang ïa ka jingïakhun jong ka kylla miet ka Assam Rifles ka la pynbud ïa ka kol ba ar lyngba u Thoudan Arjun Singh ha ka minit kaba 49 bad ïa ka kol kaba lai la thep da u Dhandeep Chetia ha ka minit kaba 54.
Ka Sacred Heart ka la hap ïalehkai noh sa tang shiphew ngut ki rangïalehkai hadien ba uwei na ki rangïalehkai u la shah sei da ka red card na ka daw ka jingïakynroi para khynnah hapoh ‘box’. Dei hangne ba ki rangïalehkai ka Assam Rifles ki la ïai bteng ban ñion tyngeh bad hashwa ban wai ka la pynbud biang ïa ka kol kaba saw lyngba u Savio Surin ha ka minit kaba 60+4 na ka bynta ban khur syndon ïa ka jingjop.
Haba phai sha kawei pat ka jingïakhun semi final ba ar, ka Umphyrnai Presbyterian SS ka la pynliem noh ïa ka Ïewrynghep SS lyngba ka tie-breaker da 2-1 kol.
Ha kane ka jingïakhun baroh ar kynhun ki la ïathep mar 2-2 kol. Na ka Umphyrnai la thep da u Damebantei Kharkongor (24) bad u Ricky Kharkongor (74 extra time). Katba na ka Ïewrynghep la thep da u Arwisstar Kharmawphlang (46) bad u Endrick Nongkhlaw (66 extra time).
Kumta ka Assam Rifles bad ka Umphyrnai Presbyterian kin ïakhun ïa ka final ka ban long ha ka sngi Saitjaiñ. Ka kynhun ban khur ïa ka nam lahduh kan ïoh ka lad ban mihkhmat ïa kane ka District sha ka State level Subroto Cup ka ban sa long shen ha kane ka nongbah.
