Shillong, Jylliew 30:
Ka Sorkar Jylla lyngba ka tnat jngohkai ka la pyllait paidbah 16 tylli ki kali ha State Convention Centre ki ban kit ïa ki nongjngohkai kiba kwah ban shim wai ban leit kai da kine ki kali kiba kham remdor. Ïa kine ki kali la tip ruh da ka kyrteng ‘Prime Tourism Vehicles.’
U Myntri Rangbah u Conrad K Sangma lem bad u Myntri ka tnat jngohkai ka Jylla, u Bah Paul Lyngdoh ki la kaweh lama kum ka dak ka jingpyllait ïa kine ki kali ban kamai haba ki kit ïa ki nongjngohkai kiba kwah ban leit shangkai suwari sha kylleng ki jaka jngohkai.
La aiti ruh ïa ki shabi kali sha kito kiba dei ban shimti ïa kine ki kali ban pynïaid.
Kine ki kali kin ai ka jingshakri lyngba ki nongpynïaid kiba shimti ban pynbiang ïa ki nongjngohkai kiba kwah ban leit da kine ki kali kiba kham rem bad kiba kham pynsuk haba leit peitkai ïa ki jaka jngohkai kiba kham sha jngai.
Haba ai jingkren, u Conrad u la pynpaw ka jingkyrmen ba ka kam jngohkai kan nang kiew lyngba kane ka sienjam kaba la pynurlong mynta hadien 51 snem.
U Conrad u la ïathuh ba ka Sorkar Jylla ka don jingthmu ban don kine ki kali kumba 50 tylli hapoh une u snem mang tyngka 2023-2024, bad ha ki san snem, lada ka biang ka jingkamai bad lah ban ai jingshakri, ki kali kin nang kham bun sha ka 250 tylli.
Kine ki kali ki dei kiba la ai jingïarap lyngba ka subsidy kaba long 50 na ka 100 lyngba ka Meghalaya Rural Bank.
U Myntri Rangbah u la ong ba ka jinglong kylluid mynsiem bad pdiang sngewbha ki nongñiah kan wanrah shibun ki jingkylla bad ki donkam ruh ïa ki jingai jinghikai.
Ha kane ka sngi, la donlang ki ophisar nalor ki nongpynïaid jong kine ki kali kiba shimti na ka Sorkar ban pynkamai.
