Ka la jan ïaid ar bnai kynthih naduh ba ka jingïakynad ha jylla Manipur hapdeng ki jaitbynriew ka la sdang bad ka la don ka jingpynïap briew ba shyrkhei nalor ka jingkylla phetwir jong ki nongshong shnong. Da ki spah ngut ki briew ki la ïap bad mynsaw bad ka long kaba i jynjar ban tip haduh lano ka jingsuk kan ïoh lad ban wanphai biang. Ha ka Sngi Thohdieng, ka la don ka jingsuba ba u Myntri Rangbah ka Manipur, u N Biren Singh, un hiar shuki noh. Hynrei kata ka khlem urlong hadien ba ki nongkyrshan jong u Biren ki la leit tur sha Secretariat bad dawa ba um dei satia ban hiar na ka shuki Myntri Rangbah. Ha ka jingshisha, ki khubor ki la dep pynbna ba u Biren un leit ïakynduh ïa ka Lat jong ka Manipur bad ban aiti ïa ka shithi iehnoh kam. Pynban, na ki dur ki dar ba la paw ha ki lad pathai khubor, la ïohi ba la don ba tar syndon ïa kata ka shithi ba la thoh da u Biren sha ka Lat. Don kiba don ba kata ka jingthmu ban hiar shuki ka dei tang ka ‘Drama’ ka BJP bad u Biren. Ka jingshisha kan sa paw shisien ka sngi la ka dei ka jingmut kaba shisha ne kaba shu kwah leh ‘Drama’ ban ïoh jingisynei bad jingkyrshan.
Ha kine ki sngi ba don ka jingïakynad, ngi ïohi ba na ka liang ka Sorkar India khamtam u Myntri Rangbahduh, u Narendra Modi, kim da shimkhia than. Ki la don ki jingïalang ha Manipur bad Delhi ban ïakren halor kumno ban pynkut ïa ka jingïakynad, hynrei ngim pat ïohi ba kan don ka jingkylla ha madan. I kumba ka sorkar jylla bad ka Sorkar Pdeng ki la dum ka buit ka stad kumno ban teh lakam ïa ka jingïakynad bad ban wanrah biang ïa ka shongsuk shongsaiñ. Ka jingjia ha Manipur ka don jingktah pat ïa ki jylla ba marjan na ka daw jong ka jingkylla phetwir ki nongshong shnong. Nalor ha jylla Assam, Mizoram, Nagaland, ki la don ruh kiba la wan poi sha Meghalaya namar ki don ki Manipuri kiba la shong la sah hangne la bun snem.
Ka long kaba lyngngoh ba haduh mynta u Modi um pat kren eiei halor ka jingjia ha Manipur. Une u dei uwei na ki Myntri Rangbahduh ka Ri uba ju smat ban kren halor kiba bun ki mat ki jura. Ngim tip na kaei ka daw ba ha kane ka kynti u dang kiar ban kren eiei halor ka Manipur. Ha ka jingshisha, u Myntri Rangbahduh u dei ban don ïa ka jingkitkhlieh kum u nongïalam jong ka Ri India. U la dei ban tuklar hi noh dalade namar haduh mynta ngim ïohi ba kata ka jingsuk kan wanphai lane ngim ïohi ba kan don ka lynti ïa ka jingsuk ba kan wan biang ha Manipur. Lehse ka lynti kaba kham biang mynta ka long ba ka Sorkar Pdeng kan shimti hi noh halade ïa ka jingsynshar ïa ka Manipur da kaba pynjari da ka jingsynshar President (President’s Rule).
Ngim pat lah ban batai haduh katno ngut ki don ki nong Manipur kiba la wan rung sha Meghalaya naduh ka 3 tarik Jymmang, 2023 kaba long ka sngi ba la sdang ka jingïakynad ha katei ka jylla. Ki lah ban don da ki phew ne ki spah ngut. Ka sorkar ka la bthah ba dei ban lum jingkheiñ ïa kita kiba la wan. Hynrei ki don ruh kiba la leit phai noh sha Mizoram. Kham bun na ki phetwir ki don ha Mizoram naduh ba sdang ka jingïakynad. Ngim tip balei ka shimpor ïa ka sorkar Manipur ba kan pynkut ïa ka jingïakynad namar katta ka nang slem, katta kan nang jynjar ïa ki nong Manipur bad ïa ki jylla ba marjan. Ngim lah ban shu shaniah sah ha kiwei ki jylla ba kin ai jaka shong ïa kiba wan phetwir. Kan sa poi ka por ba kita ki jylla ruh kin ym lah shuh ban shakri ïa ki phetwir. Lada kan jia kumta, mano ban shim jingkitkhlieh?
Katba ka jingïakynad kam pat kut, ngi sngewdei ban kyntu ïa ki pulit ka jylla ki dei ban pynkhlaiñ ïa ka jingpahara bad jingkhynra ha khappud kiba dei ki bynta ban rung sha Meghalaya. Kawei pa kawei ka kali kaba nabar ka dei ban shah khynra ban peit mano kiba wan ba leit. Lada ym lah ban teh lakam naduh na khappud, ngin ïa beh shano shuh ïa ki briew ynda ki la wan poi haduh ha ki shnong ki thaw. Ka sorkar ka dei ban pynmih da ki kyndon kumno ki pulit kin leh lada ki lap ïa ki nong Manipur kiba wan rung sha Meghalaya. Kata ka ‘Standard Operating Procedure’ (SOP) ka dei ban don khnang ba kan ym mih jingkulmar hadien habud.
