Shillong, Jylliew 30:
Ka lympung ïalehkai District Level Inter School Subroto Mukherjee Cup Football ba la pynïaid da ka shlem treikam u District Sports Office (DSO), East Khasi Hills District ka la jan poi artad sha kaba kut ha kaba ki kynhun kin pynkhreh ban ïakhun ïa ka final na ka bynta ban ïaknieh ïa ka nam lahduh ha ka sngi Saitjaiñ ha madan MFA Turf, Third Ground Polo.
Kine ki kynthup ïa ka H. Elias Memorial HSS bad ka Ïewrynghep Secondary School ha ka Under-17 (girls), ka H. Elias Memorial HSS bad ka Assam Rifles Public School ha ka Under-17 (boys), katba ka Assam Rifles Public School bad ka Umphyrnai Presbyterian School ha ka Under-14 (boys).
Haba phai sha ka jingïakhun semi final jong ki kynthei (U-17) ha ka sngi Thohdieng ha madan Third Ground, Polo, ka H. Elias Memorial Hr Secondary School ka la lah ban pynliem da 2-0 kol ïa ka Umpohliew Jingtip H.S.S.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol. Hashwa ban kut ka jingïalehkai, ka H. Elias ka la ïoh ban pynkhih jar nyngkong eh lyngba ka Elviorika M. Sohkhlet ha ka minit kaba 60+9 bad ïa kane la ïarap pynbud da ka Risalin Suting. Shwa ban wai artad ka Risalin ka la ïoh ban thep kol ha ka minit kaba 60+11 na ka bynta ban khur syndon ïa ka jingjop.
Ha kawei pat ka jingïakhun semi final kaba la long kham hashwa, ka Ïewrynghep Secondary School ka la pynliem noh ïa ka Tyrsad Higher Secondary School da 3-1 kol. Ka Ïarihun Songthiang ka la ïoh ban thep ar kol ha ka minit kaba 21 & 50 na ka bynta ka Ïewrynghep bad ïa kawei la thep kham hashwa da ka Nazareen Nongdhar ha ka minit kaba kaba 5. Katba na ka liang ka Tyrsad la thep da ka Ïaitibahun Khongsit ha ka minit kaba 54.
Ha ki jingïakhun semi final jong ki shynrang U-17, ka H. Elias Memorial Hr Secondary School ka la lah ba kan pynliem noh ïa ka Umphyrnai Presbyterian Secondary School lyngba ka shi kol ba la thep da u Yohaan Benjamin ha ka minit kaba 20.
Ha kawei pat ka semi final ba ar, ka Assam Rifles Public School ka la pynliem noh ïa ka Shillong College Higher Education lyngba ka tie-breaker da 3-2 kol hadien ba ïakhaid mar 1-1 kol.
Ki kynhun ki ban khur ïa ka nam lahduh ha kane ka lympung kin ïoh ka lad ban mihkhmat sha ka State Level Subroto Cup ka ban sa long shen ha kane ka nongbah.
