Shillong, Jylliew 30:
Ka klob ïalehkai Indian Super League (ISL) ka NorthEast United FC ka la pynkhreh ban wanrah biang ïa u rangïalehkai ka Jylla u Redeem Tlang na ka FC Goa na bynta ka aïom ïalehkai 2023-24.
Utei u rangïalehkai shapdeng ba dang 28 snem ka rta u la pynkut noh ïa ka kontrak bad ka FC Goa ha u Jymmang mynta u snem. Kumta ka NEUFC ka la khmih lynti ban soi ïa u.
Kumba ka paw u Redeem u la long u rangïalehkai uba paw na katei ka klob kaba na Goa bad u la ïoh ban ïalehkai 18 sien, thep lai kol bad ïarap pynbuh bol ar sien.
Utei u rangïalehkai uba la san ha ka kam ïalehkai na ka shlem ai jinghikai jong ka Shillong Lajong Academy, u la kiew kyrdan na katei ka klob ban ïoh ïalehkai nyngkong ha ka I-League pyrshah ïa ka Churchill Brothers ha u Risaw, 2013.
Ha ki khyndai snem ba u la don bad ka Shillong Lajong, u Redeem u la ïoh ruh ka lad ban ïalehkai ha ka ISL da ka jingshimwai ka NEUFC.
Ha kaba sdang jong ka aïom ïalehkai ISL, une u rangïalehkai u la ïoh ban ïalehkai shisien kum u rangïalehkai shongben ha ka bynta ban jop da 3-0 kol pyrshah ïa ka Chennaiyin.
U la pynïasoh pura (permanent) bad katei ka kynhun na ka bynta ka aïom ïalehkai 2018-19, ha kaba u la ïoh ban ïalehkai 19 sien bad dei ha kane ka aïom ba la NorthEast United FC ka la ïoh rung sha ka ‘playoffs’ ha ka sien kaba nyngkong eh.
Ha ka ïew ïathied rangïalehkai 2020, utei u rangïalehkai shapdeng ka Jylla u la pynïasoh sha ka FC Goa ha kaba u la pynlut ïa ka por ïalehkai ha kane ka klob, kynthup ïa ka jingleit ïasoh wai (loan) sha ka Odisha FC. Kumta utei u khlur ïalehkai ka Jylla un wanphai biang sha kane ka klob barim.
