![Pan map u heh pulit ba siat ïa u khynnah 17 snem ha France France](https://unongsainhima.com/wp-content/uploads/2023/07/France-720x442.webp)
Paris, Jylliew:
Katba ka jingiakhih jong ki paidbah nongshong shnong ka Paris ka dang shit rhem bad iaid sha khmat, u heh pulit uba don kti ban siat iap ia uwei u khynnah ha ka Sngi Ba-ar u la mih shakhmat ban pan map na ki bahaiing- hasem jong utei u khynnah hadien ba u la shah pynngat ha ka kti ki pulit ka tnat tohkit bniah.
Ha katei ka sngi, la ong ba utei u heh pulit uba siat ia utei u khynnah, ha kaba nyngkong u la pan map ia utei u khynnah uba la khlad ha katei ka jingjia kaba khlem poi pyrkhat. Ha ka bynta kaba ar pat u la pan map na ki bahaiing- hasem jong utei u khynnah, namar ka jing-leh bakla jong u ha katei ka sngi khlem da pyrkhat shuh ia ka iap- ka im.
Nalor kata, u la pynpaw ruh ia ka jingsngewsih bad jingsngew babe halor ka jingkloi jong u ban pyni da ka bor ha katei ka jingjia. Kumta ruh u la ong ba man ka sngi haba u khie na jingthiah, um ju don kum kata ka jingmut ba un ioh siat ne pyniap briew hynrei katei ka jingjia ha katei ka sngi, ka long kaba shu jia ryngkhat namar um shym lah ban tehlakam ia ka jingbitar hadien ba utei u khynnah u pyrshang ban phet na ka kti ki nong-ap pahara ha katei ka por.
Ka France ka la sakhi ia ka jingiakhih paidbah kaba jur hadien ka jingshah siat iap jong u khynnah 17 snem, uba la tip kum u Nahel bad kane ka la jia hapoh Nanterre hadien ba utei u khynnah u la iaid lait ia ka jaka peit bniah jong ki pulit kiba ap pahara ha katei ka jaka bad katei ka jingleh jong u, ka la pynlong ia ki pulit ba kin kthong bad pyn-ap suloi ia u, ha kaba u la shah siat ha kaba kut namar ka jingbym pyn kohnguh jong u hakhmat ki pulit ha katei ka jingjia.
La ong ba wat da ki heh pulit ruh ki dap da ka jing lyngngoh haba ki ïohsngew ia katei ka jingjia, namar ka jingkloi jong kitei ki heh pulit kiba don ha katei ka jingjia ban pyndonkam da ka bor pyrshah ia u khynnah uba dang hapoh ka 18 snem ka rta.
Kumta ruh ia utei u heh pulit la pynngat noh hapoh jong ki kyndon pynkheiñ aiñ kiba iahap katkum ka jingleh pynkheiñ aiñ jong u.