Shillong, Jylliew 30:
Ka United Democratic Party (UDP) ka la pynkhreh ïa 8 tylli ki jingai jingmut ki ban sa phah sha ka Sorkar halor ka mat ba ïadei bad ka bhah thung kam ne ka ‘Reservation Policy’ bad ka ‘Roster System’.
Ïa kane la pynsngew da u General Secretary ka seng, Dr. Jemino Mawthoh haba kren sha ki lad pathai khubor hadien ka jingïalang jong ka Central Executive Committee (CEC) jong ka seng kaba ka long ha ka Sngi Thohdieng.
“Kawei na ki mat kaba ngi la ïakren bha ha kane ka sngi ka long halor ka bhah thung kam bad ka ‘Roster System’. Hashuwa, ngi la shong kumba 12-13 sien ki jingïalang ha kaba ngi la ïatai-ïathir kumno ban ai jingmut haba ïadei bad ka bhah thung kam ka bym shym la khmih bniah mynta la 51 snem,” la ong u Dr. Mawthoh da kaba pynkynmaw ba ka seng ka la kynthup ruh ïa katei ka bynta ha ki mat ilekshon sha ka ïingdorbar thawaiñ ba dang shu dep.
Ha kajuh ka por, u la ïathuh ba ka seng ka la ïoh ïa ki jingai jingmut na ki ’riewstad aiñ bad kiwei ki ’riewshemphang halor kumno ban pynwandur ïa ka bhah thung kam bad ka ‘Roster System’ khnang ba ki jaidbynriew kiba shong ba sah hapoh ka Jylla kin ym shah ktah.
“Ngi kwah ban pynwandur ha kata ka rukom ba ka Sorkar ruh lada ka pynwandur ïa kane, kan ym ñiew beiñ ïano-ïano bad yn pdiang da baroh ki jaidbynriew kiba don hapoh ka Jylla,” u la ong.
Ka seng hadien ba ka la shong, ïatai bad ïathir sani bha ka la mih shakhmat bad 8 tylli ki jingai jingmut bad ïa kine yn sa phah pat sha ka komiti ba kyrpang ka Sorkar halor ka bhah thung kam bad ka ‘Roster System’ ba la khlieh da ka Dr. M. Ampareen Lyngdoh ba kynthup ïa baroh ki seng saiñ pyrthei ka Jylla.
Ha kawei ka liang, u General Secretary u la ïathuh ba ka seng ha shuwa ba kan phah ïa kitei ki jingai jingmut, ka la wanrah shuwa ïa katei ka mat ha ka CEC bad namarba ki dkhot ka CEC ki kwah ban kynthup shuh ïa ki jingai jingmut, la rai ban pynkylla ïa katto-katne kaba ka seng la buh lypa.
“Ka CEC ka la ai bor biang ïa ka ‘Core Committee’ jong ka UDP ban leh ïa kaba donkam bad ban bsut ïa ki jingai jingmut jong ki dkhot ka CEC. Kumba phi tip, kane kam dei ka mat kaba suk ban pynbeit, ngi hap ban ïatai, ïathir bad peit bha na baroh ki liang, kumjuh ban ai ka jingmut kaba bha tam na bynta ka jaidbynriew jong ngi, kumjuh ka jaidbynriew Garo, bad na bynta kiwei-kiwei ki jaidbynriew kiba la bhah ha kane ka Jylla,” u la ong.
Shuh shuh utei u nongïalam u la bynrap, “Ïa mynta, ngin rah biang shuwa sha ka ‘Core Committee’ jong ka UDP bad kan shim por sa tang 2-3 sngi, bad hadien kane, ngin sa ai jingmut sha ka Sorkar.”
