Mairang, Jylliew 30:
Ka Kynshi Bangla Social and Cultural Sports Club ka la shim ïa ka rai ban pynsangeh shwa ïa ka Knockout Football Tournament na ka daw ka jingjur u slap ha kine ki sngi kaba la pynsniew bad pynktieh ïa ka madan ïalehkai.
Kat kum ka jingpynbna kham ha shwa, ki bor pynïaid ki la thmu ban sdang ïa kane ka jingïalehkai kaba lai sngi ha ka 1 tarik, 3 tarik bad ha ka 11 tarik u Naitung ha madan ïalehkai jong ka shnong Kynshi Bangla kaba hap hapoh ka Eastern West Khasi Hills District.
Kum ban shu pynkynmaw, ïa kane ka jingïalehkai la pynlong kum shi bynta ban pynmih pisa ïa ka skul Kynshi Bangla LP School.
Haba pyntikna ïa kane u Bah Aibanrikupar Syiemlieh uba dei u nongkitkam jong ka klob, u la ïathuh ba ka daw ka long namar ka jingbym ailad ka mariang bad kan sa don ka jingthut ha ka jingïalehkai. Kumta la hap ban pynsangeh noh shwa shipor bad u la ong ruh ba ïa ka jingïakhun semi final ka ban sa long mynta ka sngi Saitjaiñ bad ha ka 3 tarik u Naitung, 2023 yn sa pynbna ha kawei pat ka por ynda ka mariang ka la ailad bad ha ka por ba duna u slap.
