Jowai, Jylliew 30:
Ka Kiang Nangbah HS School bad ka North Liberty HS School ki la rung sha ka phainal ha ka Under-17 ki kynthei jong ka lympung ïalehkai District Level Inter School Subroto Cup Football Tournament ba la pynïaid da ka shlem treikam u District Sports Officer (DSO), West Jaiñtia Hills District.
Kane ka la wan hadien ba ka Kiang Nangbah HS School ka la lah ban pynliem noh ïa ka Police Public HS School da 2-1 kol, katba ka North Liberty HS School ka la jop da 2-1 kol ïa ka Jowai Govt. UP RMSA ha ki jingïakhun semi final kiba la long ha madan Kiang Nangbah Stadium Ladthadlaboh, Jowai ha ka sngi Thohdieng.
Haba phai sha ka jingïakhun quarter final jong ka Under-14 ki shynrang, ka RC Eve Secondary School ka la pynliem noh ïa ka Ïalong Secondary School da 1-0 kol.
Ha ka jingïakhun quarter final jong ka Under-17 ki shynrang, ka Govt. Boys HS School ka la pynliem ïa ka Mang Hai Ryum Secondary School da 2-0 kol, ka Ummulong Presbyterian HS School ka la pynliem ïa ka HK. Singh Memorial School lyngba ka tie-breaker da 3-2 kol bad ka North Liberty HS School ka la pynliem ïa ka Nartiang Presbyterian HS School da 4-0 kol.
Ïa ki jingïakhun semi final ha ki ar tylli ki kyrdan ïalehkai yn pynlong mynta ka sngi Saitjaiñ. Ha ka Under-14 (Boys) ki long ka Lumpyntuh SS, Laishnong HSS, H.K Singh Memorial SS bad ka R.C Eve SS. Katba ha ka Under-17 (Boys) ki long ka Sawlyngdoh HSS, Govt. Boys HSS, Ummulong Presbyterian HSS bad ka North Liberty HSS.
Ki kynhun ki ban khur ïa ka jingjop kin pynkhreh ïaknieh ïa ka nam lahduh ha ka jingïakhun final ka ban long ha ka Lah Sngi U Blei (3 tarik u Naitung).
