Shillong, Naitung 02:
Ki paidbah kiba wan peit kai ïa ka phlim ‘Khohwah Nongsor’ ha Bijou Cinema, Shillong ki la pyrta ha u prah katba ki dang ïeng laiñ ban rung shapoh hall ha ka Sngi U Blei.
Kaba kham ai mynsiem shuh shuh ïa ki paidbah ka dei hadien ba la wan rung ar ngut ki puron phlim Khasi, kita ka Sherilin Khongwar bad ka Wanri Pyngrope lem bad Kiki Garod hapoh Bijou Cinema.
Kane ka jingpyrta ki paidbah ha u prah ka dei namar ka jingieid bad sngewtynnad haba ki ïeng laiñ ha Bijou cinema ban peit ïa ka phlim ‘Khohwah Nongsor’ kaba dang ïaid ha kane ka cinema.
Kine ar ngut ki puron ki la pynpaw ïa ka jingkmen haba ki paidbah ki wan ai jingkyrshan ïa ki phlim Khasi ha Bijou Cinema.
Ka Wanri Pyngrope ka la pynpaw ba ki dei ki juh ki briew lada dei na nongkyndong ne nongsor, hynrei kawei ka dei ka akor ban pyni sha kiwei.
Ha kajuh ka por ka la kitbok ïa kane ka phlim ba kan long kaba ïaid ïew bad ban ïawer ïa ki paidbah ban ai jingkyrshan.
Katba ka Sherilin ka la pynpaw ba kino kino ki briew haba ki wan na nongkyndong ne sor haba ki leit sha kiwei ki jaka ki dei ban kynmaw ïa ka jingsneng na la ïing. Ka la ïathuh ba ka phlim thymmai ka ban sa mih noh ha Bijou Cinema ka dei ka ‘Romeo and Rosy’ bad kaba dang pynkhreh ka dei ka Student Bangalore.
Nangta, u Kiki Garod u la ai jingïaroh ïa ki nongïashim bynta ha kane ka phlim kiba la lah shisha ban pynrkhie ïa ki paidbah bad ka phlim thymmai jong u ka dei Johkhe.com bad ka Borsing.
Katba na ka liang ki paidbah ki la pynpaw ba ka jingwan peit ïa kane ka phlim ka dei namar ka la pynktik ïa ka mynsiem haba ïohi tang ha ‘youtube’.
Ha kane ka sngi la sakhi ruh uwei u rangbah uba la ïeng kynsan na jaka shong ban shad mar shu poi ka bynta ha ka jingrwai ‘Da Ki Sur’ bad ki paidbah ki la kynhoi haba une u rangbah u la shad hakhmat ba shong ki paidbah ha ka por mynsngi.
