New Delhi, Naitung 02:
U Myntri Rangbahduh, u Narendra Modi, ha ka Sngi Saitjaiñ u la plie ïa ka 17th Indian Cooperative Congress hapoh ka phang ‘AmritKaal: Prosperity through Cooperation for a Vibrant India’ ha Pragati Maidan ha New Delhi.
U Modi u la plie ruh ïa ka ‘e-commerce website’ na ka bynta ka Cooperative Marketing bad ka Cooperative Extension bad ka rynsan Advisory Service. U Myntri Sorkar Pdeng ba dei khmih ïa ka tnat Korbar Ri bad Cooperation, u Amit Shah, u la pynïaid ïa kane ka jingïalang ba la wan ïashim bynta da kiba bun ngut.
Ha ka jingai jingkren jong u, u Amit Shah u la ong ba ki kam cooperative ki la don ha India naduh ki por shuwa ban ïoh ïa ka jinglaitluid jong ka ri bad ki la ïaid la 115 snem mynta. Naduh ka por ba ïoh jinglaitluid, ka jingdawa jong ki nongtrei ha ki kam cooperative ka kynthup ïa ka jingsdang ïa ka tnat Cooperation kaba kyrpang jong ka Sorkar Pdeng. U la ong ba mynshuwa, ki la don ki jingeh ha ka jingpynïar ïa ki kam cooperative, ka jingwanrah ïa ki jingpynkylla ha ki por ba donkam, ka jingwanrah ïa ka jingshai ha ki kam, bad ka jingpyntreikam ïa ki jingkylla na kylleng ka pyrthei ha ki kam cooperative ha India.
U Shah u la ong ba u Myntri Rangbahduh u la sdang ïa ka tnat Cooperation ba kyrpang jong ka Sokar India bad u la pyndep ïa kane ka jingdawa kaba la sah teng la 75 snem mynta. U la ong ba lyngba ka jingsdang ïa ka tnat Cooperation bad ka jingïalam lynti jong u Myntri Rangbahduh, la lah ban wanrah shibun ki jingkylla ha ki kam cooperative.
U Myntri u la ong ba hapoh ka jingïalam jong u Myntri Rangbahduh ki la don shibun ki kam ha ki kam cooperative ha ka ri. U la ong ba ka Sorkar Modi ka dang trei ban wanrah ïa ka jingryntih ha ka aiñ cooperative katkum ka Riti Synshar khlem da ktah ïa ki hok jong ki Jylla bad ka Sorkar Pdeng. U Shah u la ong ba hapoh ka jingïalam jong u Modi, ka Parliamentary Committee ka la ai jingmut ia ka jingpynkylla ia ka Multistate Cooperative Societies Act katkum ka khanasamari bad ba kane ka aiñ kan wan ha ka Dorbar ban wan jong ka Parliament.
Nalorkata, u la ong ba u Modi u la pynbeit ïa ka jingïathut ha kaba ïadei bad ka khajna bad ki jaka pynmih shini kaba kot sha ka T. 15,000 klur lyngba ka aiñ bad u la pynthikna ba yn ym don kum kine ki jingïathut ha ki por ban wan.
Shuh shuh u Shah u la ong ba Myntri Rangbahduh u sngewthuh ïa ki jingdonkam jong ka tnat Cooperation bad namar ka jingïalam lynti jong u ha baroh ki kam, ki bun ki jingkylla kiba la wan ha ki kam cooperative. U la ong ba u ngeit skhem ba yn lah ban pynurlong ïa ki jingthmu jong u Myntri Rangbahduh na ka bynta ka “Sahkar Se Samridhi”.
U la ong ba u Myntri Rangbahduh u la plie shibun ki lad na ka bynta kito kiba duk ba suk bad mynta kine ki la mih na ka jingsangsot bad ki khmih lynti ïa ka lawei kaba kham bha. U la ong ba kine ki briew kim don ka bor pisa hynrei yn leh ïa kaba donkam ban lum ïa ka bor kaba rit jong ki bad pynkylla ïa kane sha ka bor kaba khraw lyngba ki cooperative bad pynïasoh ïa ki bad ki lad ka ïoh ka kot.
U Myntri u la ong ba ki kam cooperative ki dei ban pdiang ïa ka jingshai bad ka jingkylla, ka long kaba eh hynrei ka long kaba lah ban leh bad lada lah ban leh ïa kane, ki kam cooperative ha ka ri kin ïoh ka jingkyntiew kaba khraw. U Shah u la ong ba kane ka samoi jong u Modi ka dei ka ban paw shai ha ka histori jong ki kam cooperative.
