![Kylla khlak ka saiñpyrthei ha Maharashtra: Leit kyrshan sorkar ki MLA NCP maharashtra](https://unongsainhima.com/wp-content/uploads/2023/07/maharashtra-jpg.webp)
Mumbai, Naitung 02 (UNI):
Ka saiñpyrthei ha jylla Maharashtra ka la kylla ha ka Sngi U Blei hadien ba bun ngut ki MLA na ka Nationalist Congress Party (NCP) hapoh ka jingïalam jong u Ajit Pawar ki la leit kyrshan ïa ka sorkar ba la ïalam da ka Shiv Sena-BJP bad khyndai ngut na ki MLA ka NCP ki la bam smai syndon kum ki Myntri sorkar.
Ka jingïapait hapoh ka NCP, kaba dei ka seng kaba la ïalam baroh shi katta da u Sharad Pawar, ka la wan shi snem hadien ba u Myntri Rangbah ka Maharashtra, u Eknath Shinde, u la pynpait ïa ka Shiv Sena kaba la ïalam da u Uddhav Thackeray.
Mynta ka sngi, u Ajit Pawar u la bam smai kum u Symbud Myntri Rangbah ha Raj Bhavan ha Mumbai. Nalor jong u, ki la don sa phra ngut kiwei pat na ka seng NCP kiba la bam smai kum ki Myntri. Kine ki long u Chhagan Bhujbal, Dilip Valse-Patil, Hasan Mushrif, Dhananjay Munde, Dharmaraobaba Bhagwantrao Atram, ka Aditi Tatkare, u Sanjay Bansode bad u Anil Patil.
Nalor jong u Ajit Pawar, ka sorkar ha Maharashtra ka la don lypa sa uwei u Symbud Myntri Rangbah bad uta u dei u Devendra Fadnavis na ka seng BJP.
Ha kane ka sngi ba la bam smai ki MLA ka NCP, ki nongïalam jong ka seng kiba la don lang ban sakhi ki kynthup ïa u Praful Patel, Amod Kolhe bad u Sunil Tatkare.
Na ka liang u Shinde u la kam ba u Ajit Pawar u la ju trei ha ki kam saiñpyrthei ban wanrah ïa ka roi ka kiew.
U Shinde u la kam ba na ki 54 ngut ki MLA ka NCP, 35 ngut ki la don lang ha Raj Bhavan ryngkat bad u Ajit Pawar. U la ong ba haduh mynta, u Pawar u la ïoh ïa ka jingkyrshan na palat 40 ngut ki MLA ka seng, la ong u Myntri Rangbah.
Haba kren sha ki lad pathai khubor, u Pawar u la ong ba kin sa don sa katto katne ki MLA ka NCP ki ban sa bam smai kum ki Myntri sorkar ha ki sngi ban wan.
“Nga la shim ïa ka rai (ban ïatreilang ha ka sorkar Shiv Sena-BJP) ban weng ïa ki jingeh jong ki paidbah ka jylla Maharashtra,” la ong u Ajit Pawar.
Kane kan dei ka sien kaba lai ba u Ajit Pawar u la bam smai kum u Symbud Myntri Rangbah. Ha u snem 2019, u la bam smai kum u Symbud Myntri Rangbah katba u Devendra Fadnavis u la bam smai kum u Myntri Rangbah. Hynrei kane ka sorkar ka la khyllem noh tang hapoh lai sngi.
Da ka jingkhyllem ka sorkar u Fadnavis, u Ajit Pawar u la shah thung kum u Symbud Myntri Rangbah ha ka sorkar Shiv Sena-NCP-Congress bad la ïalam da u Uddhav Thackeray. Hynrei kane ka sorkar ruh ka la khyllem noh na ka jingïapait ha ka Shiv Sena bad u Ajit Pawar u la long kum u Nongïalam ka Liang Pyrshah tat haduh mynta ka sngi ba u la leit bam smai kum u Symbud Myntri Rangbah.