Shillong, Naitung 02:
U rangïalehkai pdeng barim ka Arsenal, Barce-lona bad Chelsea u Cesc Fabregas u la pynbna ba un shongthait noh na ka jingïalehkai phutbol.
Une u rangïalehkai ba la 36 snem ka rta, u la rai ban shongthait noh na ka kam ïalehkai phutbol, hadien ba u la don bynta bad ka Spain ban rah ïa ka nam lahduh jong ka lympung World Cup, ban jop ka lympung Premier League arsien bad ka Chelsea bad ka nam lahduh jong ka La Liga bad ka Barcelona.
“Ka long shisha kaba sngewsih bha ba ka por ka la wan na ka bynta jong nga ban shongthait noh na kane ka jingïalehkai kaba sngew tynnad tam,” la ong u Fabregas ha ka rynsan Instagram ka jong u.
U la pynkut noh ïa ka jingïalehkai phutbol ha ka jingim jong u, shi snem shwa ba ka kontrak bad ka club Como ha Serie-B ha Italy kan kut. U Fabregas mynta u la rai pat ban ïarap ha ka ban ai jinghikai pyntbit pat ïa ki rangïalehkai shong ben ka Como bad ruh ïa ki khynnah ïalehkai kane ka club.
“Kam dei pat kaba sngewsih lut, watla mynta ngan nym jam shuh shapoh jong u lain lieh hynrei ban sdang ai jinghikai ïa ka club Como 1907,” u la ong bad bynrap ba kan long shisha ka jingsngewtynnad kaba khraw ban ïoh ïa kane ka club bad ka projek.
U Fabregas u la sdang ïa ka jingim ïalehkai phutbol bad ka club, da kaba pynïasoh nyngkong eh sha ka Barca La Masia Academy ha ka rta kaba 10 snem ha u snem 1997.
Hadien ba u la lah ban pyndep ka jingshah hikai bad kiew ha ki kam ïalehkai, u Fabregas u la ïalehkai haduh 212 tylli ki jingïalehkai ha ka lympung Premier League bad jop ïa ka nam lahduh ka FA Cup bad ka Arsenal hapdeng u snem 2004 haduh 2011 shwa ban leit phai biang sha ka Barcelona.
Hadien 3 snem ba u la pynlut por ha Barcelona, u Fabregas u la wanphai biang sha ka lympung Premier League ha u snem 2014 da kaba pynïasoh sha ka Chelsea, ha kaba u la ïalehkai tang kumba 200 duna ki jingïalehkai.
Hadien kane, u la leit ban pynïasoh sha ka Monaco ha France bad mih madan haduh 68 sien ha ki 3 snem shiteng bad um shym la lah ban pynjrong ka kam ïalehkai ha kane ka ri, namar ka jingshitom, bad u la rai ban phai noh sha Como.
U Fabregas uba la ïalehkai haduh 110 sien na ka bynta ka Spain, u la don bynta ruh ha kaba jop ïa ka nam lahduh ka European Championship arsien kata ha u snem 2008 bad 2012.
