Shillong, Naitung 03:
Ki nongïalam jong ki nonghikai skul kiba don hapoh ka lama jong ka Meghalaya Upper Primary School Teacher’s Association (MUPSTA) ha ka Lah Sngi U Blei ki la leit ban ïakynduh ïa u Myntri ba khmih ïa ka tnat pule puthi ka Sorkar Jylla, u Rakkam A Sangma ban pynsngew halor ka jingbymlah ban pynurlong ka sorkar Meghalaya Democratic Alliance (MDA) ïa ka mat jingdawa jong ka synjuk kata ban kyntiew kyrdan Deficit System ïa ki 844 tylli ki Adhoc Upper Primary School hapoh ka jylla.
Haba kren sha ki lad pathai khubor, u President jong ka MUPSTA, u Bah Kenneth Shadap u la ong ba ka kynhun ka la pynsngew ruh ha utei u Myntri halor ka jingbym ïoh jingïarap Non Recurring Grant-In-Aid la 20 snem kynthih jong ki skul Adhoc kum ka Maintenance Grant, ka Infrastructure Renovation bad kiwei kiwei ki jingmyntoi kumba ïoh lem da ki skul SSA.
U Bah Kenneth u la ong ba katei ka synjuk ka la ïoh ïa ka jingtyrwa naduh u snem 2019-2020 ha kaba ka sorkar ka lah ong ba kan kyntiew noh sha ka Deficit System ïa ki 844 tylli ki skul hynrei namar ka jingwan lynshop noh jong ka khlam Covid-19 ka la pynlong ïa ka sorkar MDA-1 ba kam lah ban pyndep ïa katei ka jingkular.
“Hynrei ngi la ong ba kaei ba ka MDA-1 kam lah ban pyndep, ka dei ka jingkular jong ka MDA-2 ban pyndep ïa kaei ba ka MDA-1 ka khlem lah ban pyndep”, la ong u Bah Kenneth.
Na ka liang jong u Myntri u la ong ba na ka liang ka tnad kan sa khmih bha halor kane bad kan shimpor ïa ka tnad ban pyndep ïa katei ka kam. Kumta na ka liang jong ka synjuk ka la ong ruh ha utei u Myntri ba u snem ba la dep, ka synjuk ka la ïoh ïa ka jingtyrwa ba ha ka kyrteng jong ki Adhoc baroh yn ai ‘increment’ mar T. 18,000 hynrei kaba sngewsih ka long ba la ai ‘increment’ tang ïa ki nonghikai Secondary bad Higher Secondary kata mar T. 9,000 katba ïa ki nonghikai Lower Primary bad ki Upper Primary la ai tang mar T. 6,000.
Ki nongïalam jong ka MUPSTA ki la ong ba ïa mynta khnang ba kan long ka jingïarap kaba shipor, ka synjuk ka la dawa ba dei ban ai sa mar T. 3,000 ba kan ïa ryngkat ïa kato ka T. 9,000 ïa ki nonghikai Upper Primary bad ba kan treikam naduh mynshem snem kumba la leh ïa ki nonghikai Secondary bad Higher Secondary School.
“Ka jingïarap kaba kyrkieh ka long ban ai noh sa mar T. 3,000 ban ïa ryngkat bad ka ‘increment’ kaba ki ïoh ki Secondary bad Higher Secondary ka ban treikam naduh mynshem snem bad ïa kato ban dang leh noh mynta shipor”, la ong u Bah Kenneth.
Shuh shuh u Bah Kenneth u la pynpaw ha utei u Myntri ba ki nonghikai Adhoc ki la trei 30-35 snem, hynrei hadien ba ki la shongthait la bret noh ïa ki ha ka jaka bret ñiut ha kaba ki khlem ïoh eiei. Kane ka la wanrah jingeh ïa ki ba kin im ha ka jinglong tymmen bad u la ong ruh ba ka seng ka la pynsngew ha utei u Myntri halor ka jingïakynduh jingeh jong ki skul Adhoc khamtam ha kaba ïadei bad ka jingthung kam khamtam ynda la poi ka por ba ki nonghikai ki la shongthait lane ki khlad noh bad ka jingeh ka dei na ka daw ba la bthah ban thung kam da ki nonghikai kiba la pyndep ïa ka Meghalaya Teachers Eligibility Test (MTET) ha kitei ki skul Adhoc.
