Shillong, Naitung 03:
Ka Meghalaya High Court ha ka Lah Sngi U Blei ka la kynthoh ba ka paw ba ka Harijan Panchayat Committee (HPC) ka leh bym hok ïa ka sorkar bad kumjuh ruh bad ka ïingbishar.
“La pynpaw bakla ha ka jingbishar ba khatduh ba ka don sa tang khyndiat khynsoit ka kam ba dang sah, hynrei kham hadien pat, la ai ïa ka jingkynthoh ba ka High Court ka la sngewthuh bakla ïa kaei kaba la kren hapoh ka ïingbishar,” la ong ka Division Bench jong ka High Court.
Ka jingkynthoh jong ka ïingbishar ka long hadien ka jingbishar kaba la long ha ka 7 tarik Jylliew, 2023.
Lah ban kdew ba ha ka 7 tarik Jylliew, ka Harijan Panchayat Committee (HPC) ka pdiang ka rukom pynwandur lane ‘blueprint’ kaba la pynkhreh da ka Sorkar Jylla haba ïadei bad ka jingpynkynriah ïa ki 342 tylli ki longïing na Them Metor sha ka jaka kaba la don lypa jong ka Shillong Municipal Board (SMB), bad ki don ki jingai jingmut kiba donkam ban pynbeit ha ki katto katne ki bynta.
Kane ka jingpdiang ka HPC ka la paw ha Ïingbishar lyngba u nongsaid aiñ ba mihkhmat ïa ka HPC.
Katkum ka hukum kaba la pynmih da ka Ïingbishar Meghalaya High Court hadien ba la shim ban bishar ïa ka mukotduma ha ka 7 tarik Jylliew, la ong ba na ka liang u Advocate General ka Sorkar Jylla u la pyntip ba u nongsaid aiñ ka Harijan Panchayat Committee u la pyntip ba la pdiang ïa ka ‘blueprint’ kaba la pynkhreh da ka Sorkar, hynrei la ai jingmut ruh ban pynbeit ïa ki katto katne ki bynta kiba don ha ka.
Ka Ïingbishar ka la ong ba namar ba ka Sorkar Jylla ka dang peit ïa ki jingai jingmut kiba ïadei bad ka jingpynbeit ïa ki katto katne ki bynta jong ka ‘blueprint’, la buh por lai taïew ban shim bishar biang ïa kane ka kam ha kaba la kyrmen ba kine ki mamla (parties) kin lah ban pynbeit noh ïa kane ka jingeh kaba la sahteng kan kut noh.
La buh ban shim bishar biang ha ka 3 tarik Naitung, 2023.
Kum ban pynkynmaw, ka Sorkar ka la wanrah ïa ka ‘blueprint’ hadien ba la kyntait ïa ka jingtyrwa kaba la wanrah da ka HPC ha ka 25 tarik Ïaïong, 2022 kaba kynthup ïa ka jingai jaka kumba 200 square metre ha European Ward sha man kawei ka longïing baroh 342 tylli nalor ka jingbei ïa ka jinglut ban tei ïa ki ïing.
Mynta ka sngi, ka High Court ka la pynpaw ïa ka jingkyrmen ba ka sorkar kan shim mardor ïa ki sienjam kiba donkam bad kan pynkut noh ïa kane ka kam kham kloi katba lah.
Ka jingbishar kan long biang ha ka 18 tarik Naitung, 2023 bad ka sorkar kan hap ban ai da ka kaiphod halor kaei kaba ka la leh ïa kaba la bthah mynta ka sngi.
