Ka Assistive Technology (AT) lane ka teknoloji kaba ai jingiarap ka dei kano kano ka tiar ne ka jingai jingshakri kaba plie lad ia ki briew kiba don jingduna ha ki dkhot met lane kano kano ka jingpang ba kin leh ia ki kam kiba man ka sngi bad ba kin kyntiew ia ka rukom im. Katkum ka Global Report on Assistive Technology (GReAT) kaba nyngkong kaba la pyllait paidbah da ka WHO bad UNICEF ha u bnai Jymmang 2022, palat 2.5 billion ngut ki briew ha ka pyrthei ki donkam kumno kumno kawei na kine ki tiar kiba ai jingiarap. Ha India, ki don kumba 26.8 million ngut ki briew kiba don ia ki jingduna ha ki dkhot met katkum ka khanasamari 2011, bad kane ka pyni ia ka jingdonkam ia ka assistive technology hangne.
Ki briew kiba don jingduna ha ki dkhot met ki shem shibun ki jingeh kiba kynthup ia ka jingjynjar ban ioh ia ki lad pule puthi, ioh kam bad ioh jingsumar. Shuh shuh, bun ki briew kiba don jingduna ha ki dkhot met ki jynjar ban ioh ia ki jingshakri ha ka leit ka wan bad ka jing ioh jaka sah. Ka Assistive Technology ka lah ban don ka bynta kaba khraw ban pynbeit ia kine ki jingeh da kaba iarap ia ki briew kiba don jingduna dkhot met ba kin pyndep ia ki kam ba man ka sngi bad iashim bynta ha ka imlang sahlang.
Ka Artificial Limbs Manufacturing Corporation of India (ALIMCO), ka PSU jong ka Sorkar Pdeng hapoh jong ka tnat Social Justice and Empowerment ka thmu ban pynbiang ia ki tiar ai jingiarap kiba bha bad ki jing iarap ia ki briew kiba don jingduna ha ki dkhot met. Katba dang iaid ki snem, ka ALIMCO ka la don ka bynta kaba khraw ha ki kam AT ha India. Ka ALIMCO ka shna shibun ki tiar ai jingiarap kiba kynthup ia ki prosthesi, orthosi, ki tiar ba iarap ban iohsngew, bad ki tiar ba iarap ia ki briew ban khih shane shatai kum ki Tri Cycle, ki wheelchair, ki diengduh, ki tiar ba iarap iaid bad kiwei kiwei.
Ka ALIMCO ka la shim ia ki sienjam ban pynthymmai ia ki jaka treikam bad pynmih ia ki tiar kiba bha khnang ban iaryngkat bad ki jingkylla ha kylleng ka pyrthei. Ha kane, ka ALMCO ka la iatrei lang bad ki kompani nabar ri bad ka la soi ia ka ToTban plie lad ia ka jingshna hapoh ri ia ki Lower Limb Prosthetic Component (ki kjat) bad ki active wheel chair. “Parivartan Kit” na ka bynta ki prosthetics ba la shna da ka ALIMCO ka dei kaba kham jemdor haba ianujor bad ki prosthesi ba wanrah nabar ri, bad ia kine la pyndonkam da ki hajar ngut ki briew ha kylleng ka ri. Ki diengduh ‘Sugamya’ ba saindur bad shna hapoh ka ri na ka bynta kito kiba don jingduna ha ka bor iohi ki don hapoh ka Atma Nirbhar Bharat Campaign.
Ki sienjam da ka ALIMCO na ka bynta ka jingpyndonkam ia ka teknoloji ki kynthup ia ka Prosthetic & orthotic centre kaba katkum ka juk mynta; ka jingpynbha ia ka jingsaindur – 3D Modeling and Analysis software; ka Computer Added Designing (CAD) & Computer Added Manufacturing (CAM) kaba kynthup ia ka 3D Printing; Ka jingpyndonkam ia ka CNC Sliding Head Machine & CNC Turn Mill Machine; Spectro Analyzer – Na ka bynta ka jingbeit ha ka jingpeit ia ki nar; Ki bynta ba thymmai kum ka Reverse Drive & Disc Brake ha ki Motorized Tricycle baiaid da ki battery; bad ka jingsaindur ia ki Active Wheel chair ba lah ban khylliap bad ki Wheel Chair kiba lah ban iaid ha ki jaka ba sniew surok.
Ka Accessible India Campaign ba la sdang da ka Sorkar ha u snem 2015 ban plie lad ia ki jaka paidbah bad ki lad ka leit ka wan ia ki briew kiba don jing duna ha ki dkhot met ka peit bniah ia ka jingplie lad ia ki briew kiba don jingdunaha ki dkhot met ba kin ioh ia ki teknoloji kiba ai jingtip bad kiba plie lad ia ka jingiakren.
Ka National Action Plan for Skill Development kaba la sdang ha u snem 2015 ka thmu ban ai jinghikai ia shi million ngut ki briew kiba don jingdunaha ki dkhot met shuwa u snem 2022 ha ka jingdon ruh ki lad ban ai ia ki AT sha ki briew ba don jingduna ha ki dkhot met khnang ba kin iarap ia ki ba kin pyntbit ialade.
Ka skhim Assistance to Disabled Persons for Purchase / Fitting of Aids and Appliances (ADIP) jong ka tnat Empowerment of Person with Disabilities (DEPwDs) ka ai jingiarap pisa ia ki briew kiba don jingduna ha ki dkhot met ba kin thied ia ki tiar ai jingiarap bad mynta ka treikam ha jan baroh ki distrik jong ka ri ban pynbiang ia kine ki tiar ia ki briew kiba don jingdunaha ki dkhot met ha ka dor kaba jem lane ha kaba shu ai ei.
La seng haduh khyndai tylli ki National Institute ha kylleng ka ri hapoh ka DEPwDs ha ryngkat 21 tylli ki Composite Regional Centre (CRCs) kum ki dkhot jong ki National Institute.
Ka India ka la mad ia ka jingkiew ki start-up kiba trei ban kyntiew ia ki jingpynbeit AT na ka bynta ki briew kiba don jingdunaha ki dkhot met da kaba pyndonkam ia ki teknoloji katkum ka juk mynta ban saindur thymmai ia ki tiar na ka bynta jong ki kiba lah ban iarap ia ka jingiadon bynta jong ki bad ka jingkyntiew ia ka jingim jong ki ha ryngkat ka jingkyrshan jong ka Sorkar India.
Mynta ka AT ka dei ka phang kaba don shibun ki jingiakren ha ka World Forum on Disability, kaba dei ka prokram kaba peit bniah ia ka jingkyntiew ia ka jingim jong ki briew kiba don jingdunaha ki dkhot met. Ki lad treikam jong ka AT ha ki kam kiba iadei bad ki briew kiba don jingduna ha ki dkhot met ki long kiba bun bad ki start-up bad ki nongsaindur thymmai kiba peit ia kine ki kam ki dang kham bun katba dang iaid ki sngi. Ka Sorkar ka la ithuh ia ki lad kiba don ha ki jingpynbeit lyngba ki AT khnang ban kyntiew ia ka jingdon bynta bad ka jingkyntiew ia ka jingim jong ki briew kiba don jingduna ha ki dkhot met bad ka dang shim ia ki sienjam ban kyntiew bad pynsaphriang ia ki jingpynbeit lyng-ba ki AT. Lyngba ka jingbteng jong ka jingbei tyng-ka bad ka jingkyrshan, ka India ka don ka lad ban long ka nongialam ha ka pyrthei ha ka jingshna bad jingpdiang ia ki jingpynbeit lyngba ki AT.
U nongthoh u dei u Secretary, ka tnat Empowerment of Persons with Disabilities (Divyangjan),hapoh ka tnat Social Justice & Empowerment, Sorkar India.
Da u Rajesh Aggarwal
PIB
