Shillong, Naitung 03:
Uwei u briew ba la tip kyrteng kum u Pynsuklang Khongwir, 38 snem u la duh noh ïa ka jingim na ka jingbthei ka bym pat lah ban tip haduh mynta kumno ka jia hapoh ka ïingsah jong u kaba don ha shnong Lumkynsai hajan jong ka Don Bosco School ha Smit, East Khasi Hills district.
Kane ka la jia ha ka por kumba 12 baje eiei mynsngi jong ka Lah Sngi U Blei. Wat la ka jingbthei ka la long kaba sawa jam bad wanrah ruh ka jingjulor ïa ki bynta jong katei ka ïing, hynrei ym pat lah ban pynthikna pat ïa kane ka jingbthei, hato ka mih kumno.
Na ka liang jong ki pulit mar ïa ïoh jingtip ryngkat bad ki pulit ‘Bomb Squad’ ki la hiar mar mar sha katei ka jaka ban pynlong ka jingtohkit khnang ban lap ïa ka daw jong ka jingbthei.
Ha kaba ïadei bad kane ka jingjia, na ka liang u Superintendent of Police ka East Khasi Hills, Bah S Nongtnger ha ka kyrwoh khubor ba la pyllait, u la pyntip ba ha kane ka jingjia bthei, u Bah Pynsuklang Khongwir uba don ha jingthiah pang, u la khlad noh hashen.
Shuh shuh u la pyntip ba ka jingbthei ka long kaba la jam bha haduh ba ka la pynjulor ïa katto katne ki kamra jong ka mala ba nyngkong hapoh kane ka ïing.
U SP u la pyntip ruh ba ha ka jingtohkit, ki bahaïing hasem ki la pyntip ba une u rangbah ba khlad u dei uba dang shu dep leh ïa ka ‘spinal surgery’ ha kine ki ar bnai ba la leit bad u la shu thiah beit ha jingthiah. Ki la pyntip ruh ba une u rangbah u la pyrshang ban dkhat jubor ïa la ka jingim haduh ar sien kynthih.
“Ha ka jingtohkit ïa ka jaka ba mih ka jingbthei, la lap ïa ki lyngkhot lyngkhai kiba dei ki thymmei jong kane ka jingbthei. Ka kynhun Bomb Squad bad ka kynhun CSU ki dang tohkit ïa ka daw jong ka jingbthei,” u la ong.
Ha kaba ïadei bad kane, na ka liang jong ki pulit kila register case bad ka jingtohkit mynta ka dang ïaid shakhmat.
