Shillong, Naitung 03:
Ka jingsniew shaba palat liam jong ka surok na Laitlyngkot sha Dawki namar ka jingsangeh noh ka jingpyntrei ban pynheh ïa kane ka surok na ka daw ka jingphet lut jong ki kompeni shna surok ka la pynsyrtok shi katdei eh ïa ki nongleit nongwan, ki nongrep bad kumjuh ruh ïa ki trai bad nongñiah kali kiba ju pyndonkam man la ka sngi ïa kane ka surok.
Dang ha kine ki khyndiat sngi la sakhi ruh ba namar ka jingsniew jong ka surok, ka la wanrah ruh ïa ka jingkylla jong kawei ka trok kit mar ha Briwar hajan Siatbakon bad Nongshyrngan ha ka por ba ka dang ïaid lyngba kane ka surok.
Ka jinglong jingman jong kane ka surok hadien ka jingphet jong ki kompeni kiba la ieh shiteng ïa ka kam, ym tang ba ka la pynsyrtok ïa ki nongleit nongwan, hynrei ka la buh ruh ha ka jingma namar ka jingsniew ka la long shaba palat liam naba ha ka por hap slap lei, ym ithuh shuh kano ka thliew kaba heh ne rit.
Ha kaba ïadei bad kane ka jingsniew ka surok, ka Federation of Khasi Jaiñtia and Garo People, Riwar Mihngi Circle hapoh ka jingïalam u President, Bah Evanfield Khonglam ha ka Lah Sngi U Blei ka la leit ban ïakynduh ïa u Executive Director jong ka NHIDCL ban dawa ba dei ban phah maramot noh shwa katba ym pat sdang ïa ka jingtrei ban kham pynsuk ïa ka leit ka wan jong ki paidbah.
Ha kane ka jingïakynduh, ka seng ka la pyntip ba na ka liang u Executive Director u la kular ba tang la kham ailad ka suiñ bneng, un sa bthah ban maramot noh.
U Bah Khonglam u la ong ba ka jingsniew ka surok ka la long shisha kaba la pynjynjar haduh katta katta khamtam na Laitlyngkot sha Dawki. Dei halor kane, ba kum ka seng, ka la leit ban ïakren bad utei u heh ka NHIDCL halor ka jinglong jingman jong ka surok NH-40 kaba la buh jingeh bad jingma bad ka jingthut ïa ka kit ka bah ïa ki mar ki mata jong ki nongrep bad ki nong ïew nong hat.
Katkum ka jingtip ba la ïoh, la ong ba ha ka jingshisha ka sorkar ka la buh thong ban pyndep noh ïa ka jingpynheh ïa kane ka surok Shillong-Dawki ha u snem 2024. Kane ka jingthmu kan nym lah ban urlong namar ka jingmih ki kynrum-kynram, kaba la pynlong ruh ïa ki kompeni ban phet noh.
Kumba la ïoh jingtip, na ka liang jong ka NHIDCL ka la dep ban khot tender biang ïa kane ka surok bad ka la buh thong ban pyndep ha u snem 2026.
