Itanagar, Naitung:
Da ka jingthmu ban pynlong ïa ka ilekshon Assembly ha u snem ban wan ha Arunachal Pradesh, ka seng Aam Aadmi Party (AAP) ha kane jylla ka la pynpaw ba ka don ka jingthrang na ka bynta ban pynïakhun ïa ki kyrtong ha baroh 60 tylli ki Assembly konstitwensi, nalor ki Lok Sabha konstitwensi.
U General Secretary jong ka seng AAP ha ka jylla u Toko Nikam u la ong ba ka seng ka la don jingthmu ban pynbiang um ei, ka bording, ki lad ai jingsumar ba kot haduh T. 10 lak, bad ka jingnang jingstad kaba paka tam lada ka ïoh ïa ka jingjop ha ka jingïakhun ïa ka ilekshon Assembly 2024.
U Nikam u la ong ba lada ka seng ka shahjied ha ka bor synshar, ka seng AAP kan sa weng noh ïa ka Arunachal Pradesh Unlawful Activities (Prevention) Act of 2014 bad ka Arunachal Pradesh District Based Entrepreneurs bad ka Professionals (Incentives, Development, and Promotional) Rules of 2015.
Kum shi bynta ban burom ha kaba ïadei bad ka hok balaitluid jong ki jait niam, u Nikam u la ong ba ka seng kan sa weng noh ïa ka Arunachal Pradesh Freedom of Religion Act of 1978. U la pynpaw shuh shuh da kaba ong ba ka seng kan sa weng noh ïa ki jngeh jong ka Arunachal Pradesh Public Service Commission (APPSC) hapoh ki hynriew bnai bad ban pynsangeh noh ïa ka Arunachal Pradesh State Service Selection Board ban pynkut noh ïa ki kam bamsap.
