Shillong, Naitung 03:
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba un sa leit ban ïakynduh ïa u Myntri ka tnad pule-puthi ka Sorkar Pdeng, u Dharmendra Pradhan ha ryngkat ka jingsynran lang u Myntri ka tnad pule-puthi ka Sorkar Jylla, u Rakkam A. Sangma ban ïakren halor ka Common University Entrance Test (CUET).
Haba kren sha ki lad pathai khubor, u Myntri Rangbah u la ong ba un sa leit ïakynduh ïa u Myntri ka tnad pule-puthi ka Sorkar Pdeng ban ïakren halor ka CUET bad kumno ban wad ki lad ki lynti na bynta ban pynïeng shuh ïa ki jaka thoh eksamin hapoh ka Jylla ha ryngkat ka jingsynran lang u Myntri ka tnad pule-puthi ka Jylla.
U la ong ba un sa ïakren ruh bad u Myntri ban pynlong biang ïa ki eksamin na bynta kito ki khynnah ki bym shym la ïoh lad ban ïashim bynta ha shuwa ha ka eksamin.
“Nalor kine, ngin ïakren ruh ïa kiwei-kiwei ki mat ba ïadei bad ka tnad pule-puthi,” u la ong.
U Myntri Rangbah u la ong ba un ïakynduh ruh ïa u Chairman ka National Thermal Power Corporation Ltd. (NTPC) halor katto-katne ki kam ba ïadei bad ki ‘Power Plant’ hapoh ka Jylla.
“Ngan ïakynduh ruh ïa ki ophisar ka International Solar Mission…kane kan dei kum shi bynta jong ka CM Solar Mission. Ngi peit kumno ngi lah ban ïatreilang bad kumno ki lah ban ai jingkyrshan ïa ka Mission jong ngi haba ïadei bad ka jingpynmih bording na ka sngi,” u la ong.
Na ka liang u Sangma u la ïathuh ba un sa ïakynduh ïa u Myntri ka tnad Commerce ka Sorkar Pdeng, u Piyush Goyal ban ïakren halor ka ‘Unity Mall’ – ka projek ba kham kyrpang hapoh ka Jylla.
Shuh shuh u la bynrap, “Nga la pan ruh ban ïakynduh ïa u Myntri ka tnad ki kam ïada ri, u Rajnath Singh haba ïadei bad ka jaka jong ka Cantonment Board kaba la tyrwa ban pynkynriah noh sha ka Municipal Board, ha ka thaiñ Civil. Ngin ïakren halor kane watla ngam pat ïoh ïa ka jingpyntikna ban ïakynduh ïa u.”
