Shillong, Naitung 04:
Ka kyndon aiñ kaba kham khlaiñ ka la ap lypa ban pyrkhing ïa ka jinglaitlan jong ki nongdie drok kiba la donkti bad shah kem teng. Kane ka long namar ka tnat Social Welfare jong ka Sorkar Jylla kan pyntreikam ïa ka kyndon kaba khyndai hapoh ka aiñ Prevention of Illicit Traffic in Narcotics Drugs and Psychotropic Substance Act, 1988 lane PITNDPS Act da kaba thaw ïa ka Advisory Board ka ban sa bishar ïa ki briew kiba la dep donkti teng bad shah kem teng namar ka jingdonkti ban khaïi drok.
Kane ka la urlong lyngba ka jingtrei borbah ka tnat Social Welfare hapoh ka jingïalam u Myntri ba dei khmih ïa ka tnat, u Bah Paul Lyngdoh.
Haba kren sha ki lad pathai khubor ha ka sngi ba-ar ka 4 tarik Naitung, 2023, u Bah Paul u la ïathuh ba ïa ka Advisory Board la thaw da u Lat ka Jylla ha kaba la pynmih ïa ka jingpynbna ha ka 30 tarik Jylliew, 2023 ha ryngkat ka jingthung ïa u nongbishar ba la shongthait, u Justice Shivaji Pandey kum u Chairman nalor ar ngut ki dkhot kiba dei ki nongsaid aiñ, kita u Bah ND Shullai bad ka Tshering Yangi kiba dei baroh ar ngut ki nongsaid aiñ ha Meghalaya High Court.
U Bah Paul u la ong ba ki jingduna kiba don ha ka Narcotics Drugs and Psychotropic Substance Act ki la pynlong ïa ki nongdie drok kiba la ju donkti bunsien ban mlien biang ban donkti ban die drok hadien ba ki la ïoh jamin.
U Bah Paul u la ong ba kum u Myntri u la pynlong ar sien ka jingïakynduh bad u Symbud Myntri Rangbah, Bah Prestone Tynsong uba peit ïa ka tnat pulit ha ryngkat ki pulit ophisar ban ïakren ïa kane khamtam ban pyntreikam bha ïa ki kyndon ka Prevention of Illicit Traffic in Narcotics Drugs and Psychotropic Substance Act, 1988.
U Bah Paul u la ong ba da ka jingthaw ïa ka Advisory Board, ka don ka bor ha ka ban peit bniah ba kito kiba la donkti teng ban khaïi drok bad shahkem, kim lah ban kheiñ dewthala ïa ka aiñ kaba la don, bad lah ruh ban pynjlan ïa ka por shah set patok jong ki na ka 3 bnai wat haduh 2 snem.
Kumta u la ong ba da ka jingthaw ïa ka Advisory Board kaba dei ban don katkum ka kyndon aiñ, ka Sorkar Jylla mynta ka la don bha ka bor ban pyntreikam pura ha ka jingïakhun ïa ka thma pyrshah ïa u drok.
Ha kawei pat ka liang, haba kren shaphang ka jingïoh lad ki nongkhaïi drok ban khaïi bad nang pynsaphriang ïa une u jingdih basniew ha kane ka Jylla, u Bah Paul u la ong ba kane ka jingeh ka la nang jur namar ba ym dei ba ki don tang ki nongkhaïi kiba na kane ka Jylla, hynrei ki don ruh ki nongkhaïi kiba nabar kiba ïarap ban pynpoi sha kane ka Jylla namar ba ka Meghalaya ka dei ruh ka lynti ïaid sha kiwei pat ki Jylla.
U la ai nuksa ïa ka jingkurup drok dang shen ha kaba ka donlang ka jingïadei ki nongkhaïi na Manipur bad shabar ri kum ka Myanmar.
Namar kata, u Bah Paul u la ong ba ka bynta kaba bud ka long ban shim ïa ki sienjam ban ïakren bad treilang bad ki Jylla kiba la dep ithuh kum ki Jylla ba don ha ka jingma namar u drok khamtam haba la ker sawdong da ki khappud bad kiwei ki ri kum ka Bangladesh, Myanmar bad kiwei kiwei.
