Shillong, Naitung 04:
U kpa uba ot ryndang ïa la ki khun u dang shah set ha along hadien shi snem ba u la shah kem ha ki pulit namar ka jingleh ïa katei ka kam pap kam sang kaba la jia ha ka shnong Nongrah, Shillong ha ka 30 tarik Jymmang, 2022.
Une u kpa u dei ba la tip kyrteng kum u Jeofreeson Jana, 29 snem ka rta. Ki khun kiba la shah ot ryndang ki long u khun shynrang ba dang 2 snem ka rta bad kawei ka khun kynthei ba dang 4 snem ka rta.
Kum ban shu pynkynmaw, utei kpa u bym shym ïa shong ïa sah ryngkat shuh bad ka lok, u la khot ïa kitei ar ngut ki khun ha ka por 5 baje janmiet jong ka 30 tarik Jymmang 2022 ban ïalam thied jingbam ha dukan. Hynrei haduh 9 baje mynmiet kim shym la wanphai ïing shuh bad kumta ka kmie ryngkat ki bahaïing ki la leit wad ïa kine ki khun bad leit pyntip ruh sha ki pulit.
Nangta, kaba pynpar niangkhriat ïa ki bahaïing bad ki nongshong shnong ka dei ynda ïa kine ki heprit kiba la shah pynïap la lap harud jong ka shnong Nongrah Nonglum ha ka por 8:30 mynstep jong ka 31 tarik Jymmang, 2022.
Haba kane ka jingshah pynïap ka la dap shisnem kynthih, ki bahaïing hasem ki la leit ban buh syntiew ha ka 31 tarik Jymmang, 2023 ha u lum jingtep.
Haba ïakren bad ka Kong Ibanisha Kharbuki kum ka kmie jong kine ki khyllung ka la ïathuh ba ki bahaïing hasem ki la leit ban buh syntiew mar shu dap shisnem ha ka 31 tarik Jymmang, 2023 kum ka jingkynmaw burom ïa ki.
Ka la ïathuh ruh ba haduh mynta u kpa jong kine ki khun u dang don ha patok.
