Shillong, Naitung:
Ka JETS24x7 ha ka Lah Sngi U Blei ka la aiti da ka jingthoh ha u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ban dawa na ka Council ba kam dei shuh ban dang ai Trading License ïa kiwei pat ki Taxi Aggregator da kaba pyntreikam ïa ka kyndon 3A (1) (b) jong ka United Khasi Jaiñtia Hills District (Trading by Non-Tribals) Regulation, 1954 (As Amended).
Ha ka dorkhas ba la soi da u Managing Director u Samla Pynskhemlang W. Uriah, la ong, “ka JETS 24X7 ka dei ka thup pynïaid ïa ki thuk-thuk ar shaka na ka bynta ki paidbah nongleit nongwan ha ka jylla. Ka thong jong kane ka shlem ka long ban plie lad ïa ka lad ai-kam ai-jam ïa ki samla Khasi ha ka jaitbynriew ka jong ngi bad ka thong ka jong ngi ka dei ban “Kyntiew Ïa La Ki Jong” ha ka ktien nongwei ka dei “Uplift Our Own”.
“Ka jingseng ïa ka JETS 24×7 ka long ban ai jingshakri ïa ki paidbah da kaba pynïaid da ki thuk thuk lyngba ka Mobile Application App hapoh ka jylla Meghalaya bad ïa ka JETS la ithuh da ka Sorkar Meghalaya bad ngi la ïoh ruh ïa ka license na ka Sorkar Jylla lyngba ka Transport Department,” la ong ka dorkhas.
“Lyngba kane ka shithi ngi kum ka JETS 24×7 ngi wanrah ïa kane ka jingthoh ha ka miej ba donburom jong phi ïa ka jingpyrshah ïa ka jingai Trading License ïa kino kino ki bar jylla lane ki kompeni kiba nabar kiba thmu ban ïoh ïa ka License ban pyntreikam ïa ki kali kamai da kaba pyndonkam ïa ka internet (Taxi Aggregator). Ka jingkhang pyrshah ka jong ngi ka long katkum ki kyndon jong ka United Khasi Jaiñtia Hills District (Trading by Non-Tribals) Regulation, 1954 (As Amended), Section 3A (1) (b) kaba ong, 3A. Conditions for granting or refusing a license:(1) In granting or refusing a license under this Regulation, the License Officer or any Officer when duly authorised by the Executive Committee, shall take into consideration the following matters according to the circumstances of each case, namely: (b) Whether there is any tribal who carries on the same trade or is willing to carry on such trade for which the application of license is made,” la pynksan ka JETS24x7 halor ka jingdawa.
“Kum ka jylla ngi la don lypa ïa ki aiñ ban ïarap ïa ngi ha ka jingïaleh ha ka khaïi pateng hynrei ka shong pat ha kito kiba don ha ka bor bad ngi shaniah skhem ha ka Executive Committee bathymmai hapoh ka jingïalam i Bah Pynïaid Sing Syiem ba kan ym ailad ïa ki kompeni kiba nabar namar kumba ka long mynta ngi la don ma ngi ki trai ri trai muluk ban trei ïa kane ka kam kum ki Bike Taxi Aggregator ba nyngkong eh ha ka jylla Meghalaya,” la ong kane ka kynhun.
“Ngi kyrpad ruh ïa ki nongshong shnong jong ka jylla ba ka por ka la dei ïa ngi ba ngin sdang ban pynkylla noh ïa ka saiñ pyrkhat pyrdaiñ lada ngi kwah ban ïohi ba ka jylla kan roi kan par bad ba kan tyngshaiñ nangne shakhmat da kaba ngin kyrshan ïa la ki jong,” la bynrap ka JETS24x7.
Ka JETS 24X7 ka la pynpaw ruh ba ka jingdawa ban khang pyrshah ïa ka jingai Trading Licence katkum ka aiñ kan long ka jingkyrkhu ïa ki samla wad kam wad jam.
