Shillong, Naitung 04:
Hadien ba ka Khasi Students’ Union (KSU) South West Khasi Hills District ka la kynnoh ba ka jingïohlad jong u drok ban wan rung hapoh ka thaiñ Mawkyrwat ka dei namar ka jingbym ler kam jong ka Anti Narcotics Task Force (ANTF) kaba don ha South West Khasi Hills District ban tehlakam ïa u drok hapoh ka thaiñ baroh kawei bad ka seng ka la ong ruh ka ANTF ka don tang ïa ka kyrteng katba ka kam pat kam leh.
Ha kaba ïadei bad katei ka bynta, na ka liang u Myntri ka tnat Social Welfare, Bah Paul Lyndoh haba kren sha ki lad pathai khubor ha ka Sngi Ba-ar, u la ong ba halor kane ka jingkynnoh ka tnat kan hap ban wad bniah bad ki jingkynnoh ki lah ban wan nangno-nangno ruh, hynrei kaba donkam ka long ban peit ïa ki sakhi bad ki jingshisha.
“Hangno-hangno ngin hap ban leh katkum district wise review, ki jingkynnoh ki lah ban wan nangno-nangno ruh hynrei ngin hap ban peit kiei ki jingshisha bad ki jingthew”, la ong u Bah Paul.
U Bah Paul u la ong ba haba ka tnat ka shem ba lehse u Deputy Commissioner (DC) lane u Superintendent of Police (SP) um pyndonkam ïa ka bor jong u, ka tnat ka hap ban leh eiei halor kata bad kaba dei ban leh na ka por sha ka por ka long ban ym dei ban ailad ïa u briew ba un neh than ha kajuh ka jaka ha ka kam ka jong u namar ka lah ban pynlong ba kan don ka jingïadei bad ka jingïohnong hapdeng kine ki ar kynhun.
Ha kaba ïadei bad ka jingdawa jong ka KSU SWKHD na utei u Myntri ba ka tnat ka dei ban pynkhamti ïa ka bor ha ki Dorbar Shnong ba kin lah ban tehlakam ïa u drok hapoh ka thaiñ Mawkyrwat, u Bah Paul u la ong ba namar ba ka tnat ka la don lypa ka aiñ ban pynïaid na ka bynta ki District Committee, kumta ka tnat ha kaba ïadei bad katei ka jingdawa jong ka seng kan shong jingïalang la ka jong na ka bynta ki distrik bapher bapher.
“Ïa kato ngin shong la ka jong ka jingïalang na ka bynta ki distrik bapher bapher ryngkat ki DC bad ki SB jong baroh ki distrik jong ka jylla”, la ong u Bah Paul.
