Shillong, Naitung 04:
Ka jingdon jong ki longkmie armet kiba la khlad noh (Maternal Mortality Rate) hapoh East Khasi Hills ha u snem 2022-23 (haduh u Lber 2023) ka la hiar shi kat dei haba ïanujor bad u snem ba la dep.
“Ka jingdon jong ki longkmie armet kiba khlad ka la hiar shi kat dei hadien ka jingwan jong ka ‘Rescue Mission’ bad ka ‘Chief Minister’s Safe Motherhood Scheme’ (CMSMS),” la ong ka District Medical & Health Officer (DM&HO), East Khasi Hills, Dr. A. Lyngdoh.
Haba kren halor ka CMSMS, ka la ong ba kane ka skhim ka la ïarap shibun ïa ki longkmie armet ha kaba la pynbiang ïa ki kali ban leit shaw ïa ki ban wan ïalam sha ki jaka sumar khamtam ïa ki longkmie armet kiba don hapdeng ka jingma.
Ha kajuh ka por, ka la ong ba ka tnad ka ïatreilang bad ka tnad Social Welfare, Meghalaya State Rural Livelihood Society (MSRLS), SHG, ASHA, BDO nalor ki Village Health Council (VHC) ban pynsngewthuh paidbah khnang ban ïada na ki jingma bad ka jingkhlad jong ki longkmie armet.
Halor ki ‘Transit Home’ kiba la pynïeng hajan ki PHC/CHC, ka DM&HO ka la ong ba kine ki dei ki jaka ha kaba la buh ïa ki longkmie armet kiba la dei por hynrei ki bym pat suh kha, kiba don jingma bad khamtam kiba sah sha ki shnong kiba kham pajih na ki jaka sumar.
Ki don 26 tylli ki PHC bad 8 tylli ki CHC hapoh East Khasi Hills.
“Ka jingdon jong ki longkmie armet kiba la khlad noh ha u snem 2021-22 ka long 51 ngut, katba ha u snem 2022-23 (haduh u Lber 2023) ka long 33 ngut,” ka la ong.
Haba kylli halor ki daw jong ka jingkhlad ki longkmie armet, ka Dr. Lyngdoh ka la ong ba ki daw kiba kham hakhmat ki long ka jingtheh snam, ka jingwan slem sha ki jaka sumar ban ap haduh ban da suh (ki dei ban wan beit hapoh 37 taïew) nalor kiwei-kiwei.
“Kawei ka long ruh namar ka jingtieng ïoh ki shah puid namar ba la shah puid teng bad kumta ki kha noh ha ïing. Ka ‘Anaemia’ ne ka jingduna snam ruh ka long kawei na ki daw jong ka jingkhlad ki longkmie armet nalor ka jingkiew ka ‘BP’, ki jingpang klongsnam bad kiwei-kiwei,” ka la ong.
Ha kawei ka liang, katei ka ophisar ka la ong ruh ba sa kawei na ki daw jong ka jingkhlad ki longkmie armet ka dei namar ka jingarmet lyngba ka jingïashongkha khynnah.
Shuh shuh haba kdew ba ka tnad ka ban jur ïa ki longkmie armet ban kha beit ïa ki khyllung ha ki jaka sumar, ka la bynrap ba ki briew ki la sdang ban sngewthuh halor kane ka bynta bad haba phai sha u snem 2021-22, ka jingdon jong ki longkmie armet hapoh ka distrik kiba kha ha ki jaka sumar ka long 70%, katba ha u snem 2022-23 ka la kiew sha ka 79%.
