Washington, Naitung:
Ki pulit ka Philadelphia ha ka Lah Sngi U Blei ki la pyntip ba 4 ngut ki la khlad bad 2 ngut ki khynnah ki la mynsaw na ka jingshah synreit kuli ha katei ka miet hapoh ka nongbah Philadelphia jong ka United States. Kane ka long ka jingjia kaba thymmai bad ba hadien duh ia ka United States ba kan ioh mad ia kum kitei ki jingjia synreit kuli.
Baroh kitei kiba shah siat iap ki dei ki shynrang kiba naduh ka rta ba 20 haduh 59 snem, la iathuh u heh pulit ka Philadelphia haba iakren bad ki lad pathai khubor, ha kaba u la iathuh pat ba 2 ngut ki khynnah kiba kynthup ia i khyllung 2 snem bad iwei ba 13 snem karta, ki la ngat bad mynsaw ha katei ka jingshah siat.
Ki pulit ki iathuh ba u suba don kti ha katei ka kam u dei uba la 40 snem ka rta bad u la phong ialade da ki kynja ‘Bulletproof’ bad u rah ruh ia kawei ka suloi heh bad ka suloi rit.
Hynrei ha ka por ba ki heh pulit ki leit ktong ia u, kim shym tip la u siat da ka suloi rit ne suloi heh sha ka kynhun pulit namar u la phet noh bad kim shym la ioh bat ia u ha katei ka sngi.
Ha ki khyndiat kynta ba la leit, ki lad pathai khubor ki la pyntip ba ki don 4 ngut kiba mynsaw ha katei ka jingjia. Katba hadien ynda la ioh ia ka jingpynshai la shem ba dei tang kitei 2 ngut ki khynnah kiba mynsaw ha katei ka jingjia.
Kumta, ka tnat pulit ka la phah ia ki kynhun pulit ban leit pahara sha katei ka thaiñ bad ban thwet ruh ia utei u runar ban ioh kem bad tohkit ia u halor ka daw jong katei ka jingpynkheiñ aiñ jong u.
Ia mynta, ki pulit ki la ioh kem ia utei u briew hynrei kim pat lap ia ka daw jong katei ka jingsynreit kuli dusmon jong u ha katei ka sngi. Kumjuh ruh ki pulit ki dang tohkit bniah ia u ban tip ia ka kyrteng bad ki jingthmu ba sha lyndet halor katei ka jingleh pynkheiñ aiñ jong u.
Ki pulit ki dang wad bniah ruh hadien ba ki tip ba u don sa uwei pat u briew uba iakhun mar pyrshah bad utei u runar ha ka por ba u synreit kuli ha katei ka jaka.
Da katei ka jingjia synreit kuli ha ka miet Lah Sngi U Blei, ka long ka sien kaba 341 ia kum kitei ki jingia ba ka United States kan sakhi bad ioh mad hapoh jong une u snem.
Kane ka long katkum ka jingbuh jingkheiñ bad ka kaiphod na ka tnat Gun Violence Archive (GVA), ha kaba 21,696 ngut ki la khlad kynthup ia 12,144 ngut kiba shu bthat jubor hi ia la ka jingim napdeng jong baroh kitei ki jingjia kiba la jia hapoh jong une u snem.
Ha u snem ba la leit pat, ki don kumba 44,357 tylli ki jingiap ha kum kine hi ki jingjia synreit kuli hapoh United States, ha kaba mar shiteng napdeng jongki, ki dei kiba bthat jubor hi ia la ka jingim.
Dang ha kane ka taiew ba la lah, 2 ngut ki la shah siat iap bad 28 ngut pat kiba mynsaw na ka jingsynreit kuli naphang jong u runar ha ka phang East jong ka nongbah Baltimore.
