Shillong, Naitung 04:
Ka Sorkar Jylla ka la dep ban thaw ïa ka Search Committee na ka bynta ban ïit ïa ka Chairperson ka Meghalaya State Commission for Women (MSCW) bad ïa ka Search Committee la khlieh da u Commissioner and Secretary ka tnat Social Welfare.
Haba buh jingkylli halor ka jingthung thymmai ïa ka Chairperson ka MSCW, u Myntri ka tnat Social Welfare, u Bah Paul Lyngdoh u la ong ba ka Search Committee ha kaba yn donlang ki dkhot bad lai ngut ki Principal jong ki kolej. U kyrmen ba ka Search Committee kan sa lah ban pyndep kloi ha ka jingïit ïa ki briew kiba biang kiba dei ban shah jied.
Haba kylli halor ka ‘legal notice’ kaba la phah da ka Chairperson barim ka Kong Phidalia Toi, u Bah Paul u la kyntait ban ong ei ei.
Ka MSCW ka la paw khubor bha naduh ba ka Kong Phidalia Toi kum ka Chairperson ka la shah pan jingshai namar ka jingkynnoh ba ka don bynta ha ka saiñ pyrthei bad ïashimbynta ha ka jingïalap ilekshon u kyrtong ka NPP ha Jowai ha ka ilekshon MLA ba la dep.
Kane ka kam ka la nang mih khubor shuh shuh hadien ba u Myntri ba mynta u Bah Paul Lyngdoh u la kren shaphang ka jingweng ïa ka Kong Toi kum ka Chairperson ka MSCW.
