Jowai, Naitung 04:
Ka lympung ïalehkai 3rd Division Football Tournament-3rd Adelbert Laloo Memorial Trophy ba la pynïaid da ka West Jaintia District Sports Association (WJDSA) ka la bteng biang ha madan Kiang Nangbah Stadium Ladthadlaboh Jowai ha ka sngi Ba-ar.
Haba phai sha ka jingïalehkai ha kane ka sngi, kata ha ka jingïakhun kaba khatduh, ka Mookynphad Mihmyntdu Sports Club kala lah ban pynliem noh ïa ka Iooksi Youth Welfare da 1-0 kol bad ïa kane ka kol la ïoh ban khyrwit da u Wailad Shylla ha ka minit ba 50 jong ka jingïalehkai.
Haba phai sha ka jingïakhun kaba nyngkong ha kane ka sngi, ka Mookaswan Dongwah Sports Club ka la lah ban pynliem noh ïa ka Tympang Sports Club da 1-0 kol lyngba ka kol ba la thep da u Khel Shylla ha ka minit kaba 19.
Ha ka jingïalehkai kaba bud ka jingïakhun ka la kut noh ha ka jingïakhaid khlem da don kiba lah satia ban pynkhih jar haduh kaba kut jong ka jingïalehkai, kata kaba la long hapdeng ka Mupliang Sports Club pyrshah ïa ka Umshangiar Sports Club.
Ka jingïalehkai hapdeng jong ka Saindur Mihmyntdu Sports Club pyrshah ïa ka Lumsliar Sports Club ruh ka la kut noh ha ka jingïakhaid hadien ba baroh ar liang ki la ïoh ban khyrwit mar 3 kol.
Ïa ki kol jong ka Saindur Mihmyntdu la ïoh ban thep da u Lakhon Phawa ha ka minit kaba 5 bad 67 bad u Tremi Phawa ha ka minit kaba 41. Katba ïa ki kol jong ka Lumsliar pat la ïoh thep da u Elja Ryngkhlem ha ka minit kaba 8 bad u Dabid Dkhar ha ka minit ba 55 bad 59.
