Agartala, Naitung:
Ki pulit jong ka Tripura ki la ïoh ban kurup ïa u jingdih pynbuaid uba don 1,500 kilo u Cannabis uba la shongdor T. 2.25 klur ha Tripura. Kane ka jingjia ka la jia ha ka thaiñ Beth Cherra jong ka National Highway-8, ha Kumarghat Naka Checking.
Ïa une u drok la ïoh ban kurup na ka trok ha ka por ba la pynlong ïa ka jingkhmih bniah ha kaba u nongñiah jong ka u la phet noh na katei ka jaka hadien ba u la ïohi ïa ka kynhun jong ki pulit ha Naka Cheking.
“Ki pulit jong ka Unakoti distrik ha Kumarghat ha Tripura ki la ïoh ban kurup da kumba 1,500 kilor u Cannabis uba la song ha ki 60 song ha kaba katkum ka jingantad lada die ïa u kan long la kumno kumno T. 2 klur, la ïathuh ki pulit. “Ha kaba ïadei bad kane ka jingjia, ym pat kem ïano ïano ruh bad ka jingtrei shitom ka dang ïai bteng na ka bynta ban buddien bad ïohkem ïa ki nongkhaïi drok,” la ong u Kanta Jahangir, uba long u SP jong ka Unakoti.
