Beijing, Naitung:
Ha kane ka khubor, la ong ba uwei u khynnah u la kynthih nalor ka mala ba san jong kawei ka ïingmala ha China, tang namar ka jingshah tim- shah tla ha ka kmie. Kane ka la wanrah ia ka jingsngewkhia na kiba bun ki paidbah nongshong shnong katei ka jaka ha ryngkat ruh ka jingdawa ban pynkhlaiñ ia ki aiñ ban iada ia ki khynnah hapoh jong ka ri.
Kane ka la jia ha ka 25 tarik jong u Jylliew ba la leit, hapoh jong ka thaiñ Anhui, sha ka phang East jong ka China. Utei u khynnah 6 snem u la kynthih najrong ka mala ba 5 jong ka iing ba ki sah hadien ba u la shah bom- shah tied ha la ka jong ka kmie ha katei ka sngi.
Katkum ka video ba la saphriang paidbah hapoh Social Media, la ïohsngew bad iohi ruh ia katto- katne ki para marjan kiba la leit ban kyrpad bad ai jingmut ia katei ka kmie ba kan ym tim bad shoh than eh ia u khun rit jongka. Hynrei ha mar kata ka por la iohi kynsan ia utei u khynnah rit 6 snem uba kynthih nalor jong katei ka ïingmala ba ki shong- ki sah.
Ia katei ka video la don ruh haduh palat 10 Million ngut kiba peit hapoh ka website ‘Weibo’, kaba long ka website ba paw nam bha na China.
Ia utei u khynnah rit la pynkit noh sha ka jaka sumar ba kham hajan, ha kaba ki bor pyniaid hospital ki la pyntip ba ka jingim jong utei u khynnah ka la lait na ki jingma kiba khraw. Watla katta, katto katne ki shyieng jong utei u khynnah rit ki la kheiñ.
Hadien kata, ki pulit ki la pynshai ba katei ka kmie ka bom bad shoh ia utei u khynnah ba un rung shapoh iing namar ioh u kum leit ur ne hap nalor iing shapoh.
Ka tnat All-China Women Federation ka iathuh ba katei ka longkmie ka pyndonkam tang da u dieng ha katei ka sngi ba ka tied bad shoh ia utei u khynnah.
Hynrei la ong ba utei u khynnah, u kham sheptieng ia ka kmie ban ia kaba un hap shapoh jong katei ka ïingmala bad kumta u la rai ban shu kynthih noh shapoh ka mala tang ba un lait na ka jingshah tied- shah bom ha ka kmie jong u ha katei ka por.
Ia utei u khynnah rit la ju khot ieid da u ‘Yan’ bad la ong ba u kpa jong utei u khynnah, u trei sha kawei pat ka nongbah, ha kaba u shong- u sah bad la ki kur- ki jait.
