Punjab, Naitung:
Ki pulit jong ka distrik Kasur hapoh Punjab Province ha ka Sngi Nyngkong ki la pyntip ba uwei u rangbah u la pyniap ia la ki khun kynthei hapoh ka iingsah lajong.
Ia utei u kpa la ithuh kum u Saeed. U Saeed u la siat ia la ki khun kynthei hapoh ka iingsah lajong ha ka thaiñ Haveli Nathowali tang namar ka burom jong ka iing. Baroh 2 ngut ki khun ki la khlad noh hashen hi namar ba kim lah ban ioh ia ka jing-iarap bad ka jingsumar ha ka por kaba biang.
La ong ba utei u kpa u la phet noh tang mar ia dep leh ia katei ka kam pyniap briew.
Ki pulit ki la rah noh ia ka metïap jong kitei ki khynnah sha ka hospital kaba don hapoh jong katei hi ka distrik na ka bynta ban pyndep ia ka Post-mortem.
Ha kajuh ka por, ki pulit ki dang thwet ban ioh kem ia utei u rangbah uba la phet bad jah rngai noh tang mar ia dep leh ia katei ka kam pap kam sang.
Ha ki khyndiat sngi ba la leit jong kane ka taiew ba la leit, kawei ka jingjia kaba ïasyriem bad kane ka long haba uwei u khynnah 12 snem u la pyniap ia la ka jong ka kmie tang namar ka jingsngew jong u.
Kane ruh ka la jia hajan ka thaiñ Gujranwala.
Ki pulit ki iathuh ba katei ka kmie ka la shah siat iap ha la u jong u khun katba ka dang iaid lynti, ha kaba utei u khynnah u la ther kuli ia ka bad ka la khlad noh syndon hashen bad kawei ka briew kaba la ithuh kum ka ñia jong utei u khynnah, ka la ngat bad mynsaw lang na ka jingsynreit kuli jong utei u khynnah katba ka dang iaid bad ka kmie jong u ha ka por ba katei ka jingjia ka la jia.
Watla katta, ia katei ka longkmie la pynkit noh sha ka jaka sumar kaba kham hajan naka bynta kii jingsumar kiba bniah. Kumjuh ruh na ka liang jong utei u khynnah u la phla ba u la dep ban leh ia katei ka kam runar hakhmat ki pulit bad hadien kata, ki pulit ki la kem noh syndon ia u.
