Shillong, Naitung 05:
Ki nongkyrshan ka club Corinthians hadien ba kim shym la hun satia ïa ka rukom ïalehkai jong u rangïalehkai pdeng ka club u Luan, ki la thombor ïa u bad ban pynmynsaw malu mala, kaba la jia ha Sao Paulo.
Ka khubor na ka Corinthians kaba dei ka club phutbol ha Brazil haba pynrem jur halor kane ka jingjia, ka la pynpaw ïa ka jingsngewsih bad ka jingsngew bitar halor ka jingtip ba uwei na ki rangïalehkai ka club u Luan u la shah thombor ha ki nongkyrshan ha ka por dang step jong ka sngi Ba-ar.
Ki lad pathai khubor katei ka jaka, ki la pynmih ka khubor ba une u rangïalehkai ba la 30 snem, uba la khur ruh ka takma ksiar bad ka Brazil ha ka Olympic ha u snem 2016, u la mynsaw malu mala hadien ba u la shah shoh ha ka jingïaleh sngewbha ba u la pynlong bad tang ki 10 ngut ki briew ha kawei ka hotel.
U Luan uba la paw bha kum uwei na ki rangïalehkai bat bit ha dewbah South America, u la pynïasoh sha ka Corinthians ha u snem 2020 hynrei um shym la lah satia ban pynpaw ka jingtbit bad kane ka club na Sao Paulo. Ka kontrak jong u, kan sa kut noh ha kine ki hynriew bnai ban wan bad kiba bun ki nongkyrshan ki la kwah ba un mih noh na kane ka club.
Kumba ka long, une u rangïalehkai um shym la ai kano kano ka jingkynthoh halor kane ka jingjia bad um shym la ujor satia ruh sha ki pulit.
U Luan u la ïalehkai haduh kumba 80 tylli ki jingïalehkai na ka bynta ka Corinthians bad thep haduh 11 tylli ki kol na ka bynta ka club, kaba la shah kynjat noh na ka group jong ka lympung Copa Libertadores ha ka sien kaba ar bad ruh kaba la hiar bha sha trai ha ka lympung Brazilian League tang hadien 13 tylli ki jingïalehkai.
