Shillong, Naitung 05:
Hadien ka jingmih noh na ka Liverpool, u Roberto Firmino u la kylla long sa uwei napdeng ki rangïalehkai ba paw ban leit pynïasoh sha ka club kaba ïakhun ha ka lympung Saudi Pro League ka Al-Ahli ha ka jingsoi kontrak kaba lai snem.
Une u rangïalehkai shakhmat ka Brazil uba la 31 snem ka rta, u la lah ban leit ïasoh hadien ba ka kontrak jong u bad ka Liverpool kan kut noh ha kaba kut jong kane ka aiom.
Hadien ba u la pynïasoh sha ka Liverpool na ka club Hoffenheim ha u snem 2015, u Firmino u la lah ban khyrwit haduh 111 tylli ki kol na ki 362 tylli ki jingïalehkai ba u la mih madan na ka bynta ka Liverpool.
U Firmino un dei uwei na ki rangïalehkai ba paw ban shah soi ha ka club na Saudi Arabia ha kane ka aiom, bad un sa ïadon bynta lang bad u nongap kol ka Senegal u Edouard Mendy uba la mih noh na ka Chelsea dang ha ka taïew ba la lah ban pynïasoh sha ka club Al-Ahli.
Kumjuh ruh u N’Golo Kante bad u Kalidou Koulibaly ruh ki la mih na Chelsea ban leit ïasoh bad ki club ha Saudi Arabia, nalor kine, ka kyrteng jong kiwei pat kiba paw ki long u Karim Benzema, Ruben Neves bad Marcelo Brozovic kiba la poi sha Saudi Arabia, katba u rangïalehkai barim ka Liverpool u Steven Gerrard u la leit ban shimti ka kam manager jong ka club Al-Ettifaq.
Kane ka jinglong ka kdew ba ka thong jong kane ka lympung ka long ban kiew bad long kawei napdeng ki 5 tylli ki lympung ba paw ha ka pyrthei bad ban bud ïa ka rai ha u bnai Jylliew da ka Saudi Arabia Public Investment Fund (PIF), kaba long trai ïa ka club Newcastle United.
U Firmino uba la ïadon bynta ha ka bynta ba shakhmat ryngkat u Mohamed Salah bad Sadio Mane, u la lah ban ïarap ïa ka Liverpool ban jop bad rah ïa ka nam lahduh jong ka Champions League ha u snem 2019, ka nam lahduh ka Premier League ha u snem 2020 bad kumjuh ruh ka nam lahduh ka FA Cup bad League Cup ha u snem 2022.
Dei ha u bnai Lber ba la pynbna ba un sa mih noh na ka Liverpool, kata ha kaba kut noh jong ka aiom ïalehkai.
