C. B. Iawphniaw
Ka ai jait kmie kam dei ka dustur ka riti. Lada ngi dang ñiewkor ban pynneh ïa ka ai jait sha ka kmie ka jaitbynriew jongngi ki Khasi ka lah ban jah noh. Kane ka ai jait kmie kam dei kata ka dustur ka riti u barim bajah. Ka dei ka dustur khyllah kaba pynkylla Khasi ïa ki bym dei ka snam Khasi paka.
Dei ha u snem aïu ba ka sdang ban ai jait sha ka kmie? Ha ka jingshisha dei ka hok ïa u shynrang ban ai ïa ka jait ka khong. Namar ïa ki khun la ïoh symbai na u shynrang (Kpa) ki khun ki dei kiba hiar pateng na u kpa ym na ka kmie kumba long lem ha kiwei ki jaitbynriew ba ai jait sha u kpa. Namar haba shu shim ïa ka jingïadei shi para trai ka dei beit na ujuh u kpa bad ka kmie. Haba ïapher u kpa ym dei shuh shipara trai, namar la ïapher u symbai. Lada ïapher ki kmie ujuh u kpa dei hi shipara trai. Haba ïapher u kpa ym dei shuh shipara trai, la khot noh shipara ar kpa. Dei kane ba ha ngi ki Khasi ngi burom bha ïa ka Meikha namar ngi ioh ïa u symbai u rnai na ka liang ka Meikha. Te ka jingioh jait kmie ki khun bar jylla ym dei Khasi ka long ka daw bah ba ka jaitbynriew Khasi kan sa jah noh ha ki pateng ban wan.Namar ki khun na ki kpa bym dei Khasi kim dei ka doh ka snam Khasi paka. Ynda la bun than ki khun na ki kpa bym dei Khasi ka jaitbynriew ka la jah noh. U symbai Khasi u la shah tep noh hapoh khyndew maw bym lah mih shuh u symbai Khasi paka.
