Nongstoiñ, Naitung 05:
Ka skul Nongstoiñ Public School, ka St Anthony’s Secondary ki la jam sha ka semi-final ha ka U-14 Boys jong ka lympung District Level Subroto Mukherjee Cup Football Tournament 2023 ba la pynlong da ka shlem treikam District Sports Officer (DSO) West Khasi Hills District.
Katba ki skul ba la rung semi-final ha ka U-17 ki khynnah shynrang ki long ka Joel Gatphoh Memorial, ka Anderson Higher Secondary, ka Sib Singh bad ka Rev JJM Nichol’s Roy.
Haba phai sha ka jingïalehkai quarter final ha ka U-14 ki shynrang, ka Nongstoiñ Public School ka la lah ban pynliem noh ïa ka Donbosco Secondary School da 8-1 kol.
Ha kawei pat ka jingïalehkai quarter final ha ka U-14 ki khynnah shynrang ka St. Anthony’s Secondary School Jaidoh ruh kala ïoh ban khur ïa ka jingjop da kaba pynliem noh ïa ka Lurmangkara Secondary School da 1-0 kol.
Haba phai pat sha ka jingïalehkai quarter final ha ka kyrdan U-17 ki khynnah shynrang, ka Joel Gatphoh Memorial Higher Secondary School kala pynliem noh da 3-0 kol ïa ka Assembly of God Secondary School, ka Anderson Higher Secondary School pat kala pynliem noh da 5-2 kol ïa ka Anthony’s Memorial Secondary School, ka Sib Singh Govt. Memorial Higher Secondary School kala pynliem noh da 2-0 kol ïa ka BBL Secondary School katba ka Rev. JJM Nichol’s Roy Secondary School kala pynliem noh da 2-0 kol ïa ka BBC Secondary School Steplanglur.
Na ka liang ka shlem treikam jong ka District Sports Officer, Nongstoiñ kala pyntip ruh ba ka jingïalehkai semi final jong katei ka lympung kan long ha ka 6 tarik u bnai Naitung 2023 ha madan shnong Mawkadiang, West Khasi Hills.
