Imphal, Naitung:
Ka kynhun jong ki riewpaidbah kaba la shah kynnoh ba ka la pyrshang ban knieh bad lute ïa ki tiar ïasiat na ka jaka treikam jong ki shipai ka kynhun Indian Reserved Battalion (IRB) ha Thoubal distrik kaba don ha Manipur ha ka sngi Ba-ar, ka la wan rah ïa ka jingïakynad bad ki shipai ïada ri ha kaba uwei u briew uba la 27 snem ka rta u la shah pynïap bad uwei u shipai Assam Rifles u la shah siat, la ïathuh ki heh pulit.
Ka kynhun jong ki paidbah ka la thmu ban rung jubor ha ka jaka treikam jong ka kynhun 3rd IRB Batallion kaba don ha ka thaiñ Khangabok halor ka jingthmu ban leit lute ïa ki tair siat bad kuli ïasiat, ki la ïathuh shuh shuh.
Ym slem hadien kane ka la mih ka jingïakynad kaba jur bad ki shipai ïada. Ki shipai ki la pyrshang katba lah ban tehlakam ïa ka jingpynibor pyrshah ki paidbah bad ha kane ka por ki la pyndonkam ban siat da ki tyndong lyer pynsat khmat bad siat ruh da ki kuli jri shwa.
Hynrei naba ka kynhun jong ki paidbah ka la siat pyrshah ïa ka kynhun shipai, na ka liang ki shipai ruh da ka jingbym banse ki la pynphai kylla, la ïathuh ki heh pulit.
Ki paidbah ha kane ka por ki la khang lynti ruh ïa ki surok ban poi sha ka jaka treikam jong ki shipai ha kiba bun tylli ki jaka.
Ki paidbah ki la siat pyrshah ïa ka kynhun jong ki shipai ha kaba ka la pynmynsaw ïa uwei u shipai na ka kjat. U riewpaidbah uba la shah siat u dei uba la tip kyrteng kum u Ronaldo.
