Ka jingkylla ha ka saiñ hima sima ha Maharashtra ha ka Sngi U Blei naba ka seng Nationalist Congress Party (NCP) ka la pait hapoh ka jingïalam jong u Ajit Pawar bad khyndai ngut ki MLA ka NCP ki la bam smai kum ki Myntri ha ka sorkar ba la ïalam da ka Shiv Sena-BJP. Kane ka pyni ba ha ka saiñpyrthei ym ju don paralok ne nongshun kiba neh shirta. U Ajit Pawar u dei u pyrsa jong u nongseng ïa ka NCP, u Sharad Pawar, bad u dei ruh u nongïalam ka Liang Pyrshah hashwa ba un leit smai kum u Symbud Myntri Rangbah ha ka Sngi U Blei hapoh ka sorkar ba ïalam da u Eknath Shinde. Ka BJP ka la shah kynnoh ba ka la pynpait pynpra ïa ka NCP ha ka por ba ki seng kiba don ha ka Liang Pyrshah ha ka Ri ki ïaleh ban ïatreilang khnang ban ïakhun ïa ka BJP ha ka ilekshon MP ha u snem ban wan.
Sa kawei pat ka jingkynnoh ka long ba ka BJP ka dei kum ka nongsaitjaiñ kaba lah ban pynlieh lut ïa baroh lada ki wan pynïasoh bad ka. Napdeng ki khyndai ngut ki MLA ka NCP kiba la leit bam smai, ki don katto katne kiba don hapdeng ka jingshah tohkit ha ka Enforcement Directorate (ED) halor ki kam bamsap. Ki don ki nongïalam ka BJP kiba la sei madan ïa kita ki kam bamsap bad hadien kata, ka ED ka la sdang ban tohkit ban lap ïa ki jingshisha. Ka jingtohkit ka dang ïaid. Hynrei kyndit kynsan, kita kiba shah tohkit ka la leit pynïasoh noh bad ka sorkar ba ka BJP ruh ka don lang. Mynta kaei ka ban jia ïa ki? Hato ka jingtohkit kan bteng beit lane ki la khuid noh na ki tngit bamsap baroh namar ki la ïatreilang bad ka sorkar ba don ka BJP? Mynshwa ngi la ïohi ba kumno kito kiba shah kynnoh bamsap ki shah sait khuid ynda ki la rung sha ka BJP. Lehse ïa kita ki MLA ka NCP kiba long Myntri mynta, kaba kum kane kajuh kan wan jia. La ïoh da ka sabon BJP ka mut la khuid lut nadong shadong bad ym donkam ban sngew sheptieng shuh.
Ki kynhun tohkit kum ka ED, Central Bureau of Investigation (CBI) bad kiwei kiba kham paw, ki hap lut hapoh ka jingpeit jong ka Sorkar Pdeng. Ngim tharai ba kine ki kynhun tohkit kin nud ban saham katba kim pat ïoh jingbit na u Myntri Rangbahduh lane na u Myntri Korbar Ri. Ngi tip shai ruh ba ïa ka sorkar BJP ha Delhi la ïalam bad pynïaid tang da kine ki arngut katba kiwei pat ki Myntri ki shu long tang kum ka dur. Lada ka synshar ka khadar bad ka bishar ka ïaid ha kane ka rukom, shaei ka Ri kan poi? Kumno ba tang shu rung BJP yn jah lut plaiñ ki jingshah kynnoh bamsap bad ki jingtohkit? Shano ka hok bad ka jingshisha kan poi? Hato ki paidbah kiba la shah thok shah shukor bad shah lute ha ki ’riew saiñpyrthei bamsap kim donkam shuh ban ïoh ïa ka hok? Ka la dei ka por ïa ki paidbah kiba la shah lute na ka jingbamsap ba kin leit tied ïa ka jingkhang jong ka ïingbishar Supreme Court bad ban kyntu ïa ka ba kan tuklar halor kiba kum kine ki jingleh bymman.
Dei ka BJP ha u snem 2014 kaba la kular ban pynkhuid ïa ka Ri na ka jingbamsap bamngem. Hynrei ha kine ki 9 snem ngi ïohi ba dei tang ki nongïalam kiba don ha ka Liang Pyrshah kiba shah tohkit, shah kem bad hap shong patok. Tangba ynda kita kiba shah tohkit, kem bad shong along ki rung noh sha ka BJP, ki jingkynnoh bad jingtohkit bamsap bamngem pyrshah ïa ki, ki shu jah noh kumto ha rngai. Ym don shuh hi ruh kiba kylli pyrthew ne ki ban wad. Baroh ki ïa sngewkmen lut. Hynrei ma ngi ki paidbah kiba shah lute, ngi shu sah ha ka umdum bad ha ka jinglyngngoh. Bad ynda la kut ka san snem, ngi klet lut noh ïa kita kiei-kiei bad ngin ïa jied biang ïa kijuh sha Parliament ne sha Assembly. Ka jingkynmaw jong ngi ki paidbah ka lyngkot palat. Ngim lah ban kynnoh ïano-ïano. Lada ngim pat kylla hi nalade, ngim lah ban khmih lynti ba ki jingkylla kin wan ha ka Ri.
Kumba ka long mynta, ngim i don jingshaniah ha ki kynhun tohkit jong ka Ri wat lada ki dei ban trei katkum ki kyndon aiñ ba la buh da ka Riti Synshar. Ki aiñ ki kanun kim don dor hakhmat ki briew kiba leh bor bad kiba shu jynrat lut ïa kat kiba wit hapdeng. Mynta, lada mih ka jingkynnoh bamsap na ka liang ka BJP pyrshah ïano-ïano, ngin hap ban ïa pyrkhat bha hashwa ban ïa kohnguh khlieh namar ngi sngewthuh ba ka dei tang ka kam saiñpyrthei bad kam don jingïadei eiei bad kata ka synshar ka khadar bad ka bishar kaba hok bad kaba khuid.
