Moscow, Naitung:
Ka Russia ha ka Sngi Balang ka la kynnoh ba ka jingleit thombor ki drone ka Ukraine hapoh u pud- u sam jong ka Russia, ka dei lyngba ka jingkynshoit bad jingai mynsiem jong ka United States bad ka NATO bad ka long ruh tang hadien shi sngi ba la pynbna ba ka la ioh ban siat pynhap ia 5 tylli ki drone hajan katei ka nongbah ha ka Sngi Ba-ar.
Ha kajuh ruh ka por, ka Ukraine ka la pyntip ba 43 ngut ki briew, kiba kynthup ia 12 ngut ki khynnah, ki la ngat bad mynsaw jur ha ka jingther ‘namding jong ka Russia hapoh ka shnong Pervomaisky kaba don sha ka phang East jong ka nongbah Kharkiv.
La ong ruh ba, ka Russia, na ka por- sha ka por hi ka ju kynnoh ba ka dei ka West baroh kawei kaba ju aibor bad ai jingkyrshan ia ki kam thombor jong ka Ukraine da ki drone bad ka Russia ka ju khot ruh ia ka Ukraine kum ka ri lehnoh.
Ka tnat kam bar ri jong ka Russia ha ka Sngi Balang, ka la ong ba ki kam thombor jong ka Ukraine kin ym lah ban iaid shakhmat khlem ka jingkyrshan jong kiwei pat ki ri na ka thaiñ West.
Kane ka jingkynnoh jong ka Russia ka kynthup ia ki jingleit thombor jong ka Ukraine lyngba ki drone sha Kremlin bad kumjuh ruh ha kiwei de ki shnong jong ka Russia kiba mar khap bad ka Ukraine.
Ka tnat shipai Russia ha ka Sngi Ba-ar ka la pyntip ba la ioh ban siat pynhap ia 5 tylli ki drone jong ka Ukraine, kiba thmu ban leit thombor ia ka Russia ha katei ka sngi.
Ka Russia ka la iathuh ba ia kawei na kitei ki drone la ioh ban siat pynhap hapoh Kubinka, kumba 40 kilometre na Vnukovo International Airport.
La ong ba ha u Jymmang ba la leit, ka Russia ka la ioh siat pynhap ia 2 tylli ki drone kiba leit rung sha ka nongbah Kremlin bad ha utei hi ujuh u bnai, ki la don shibun tylli ki jingjia thombor da ki drone kiba ka Russia ka lait-im bad ioh siat pynhap ia ki.
Na ka liang jong ka Ukraine pat, ha ka Sngi Ba-ar, ka la iathuh ba ka Russia ka la phah thombor sha Ukraine da ki 22 tylli ki drone ‘Shahed’ jong ka Iran bad kumjuh ruh 3 tylli ki ‘namding ka Russia ka la ther hapoh Sumy, Donetsk bad ha Zaporizhzhia ha katei ka sngi, ha kaba ki shipai ka Ukraine ki la ioh siat pynhap noh haduh 16 tylli ki drone.
Kawei na ki jingther ‘namding jong ka Russia hapoh ka nongbah Kharkiv jong ka Ukraine, ka la leit jia hapoh ka jaka pynieng kali hajan ka ïingmala ba sah briew ha Pervomaisky, kaba long ka shnong ia 28,000 ngut ki paid nongshong shnong.
U heh ka nongbah Kyiv, u la pyllait ia ki dur hapoh Social Media ban pyni ia ki jingkem ding bad jing julor na katei ka jingther ‘namding dusmon jong ka Russia ha katei ka shnong.
