Shillong, Naitung 05:
Ka Iasnohktilang Madanrting Football Club bad ka Umpling Sports Club ki la khur ïa ka jingjop kaba nyngkong ha ka lympung Shillong Sports Association’s Women’s League kaba la long Third Ground, Polo ha ka sngi Balang.
Ha kane ka sngi, ka jingïalehkai ka la long hapdeng ki kynhun kiba khlem lah satia ban mad jingjop ha kane ka lympung haduh mynta. Hynrei baroh saw tylli ki kynhun kiba la ïakhun, ki la lah ban sei bad pyni ïa ka rukom ïalehkai kaba itynnad.
Ha ka jingïalehkai kaba nyngkong, ka Iasnohktilang ka la lah ban jop da 2-0 kol ha ka jingïakhun pyrshah ïa ka Kharang Sports Club ha ka Group B, katba ha ka jingïalehkai kaba ar, ka Umpling ka la lah ban pynliem noh ïa ka Mawkriah West Sports Club da 1-0 kol ha ka Group A.
Baroh lai tylli ki kol ha kitei ar tylli ki jingïalehkai ki la wan ha ka kylla miet jong ka jingïalehkai. Ka Jerina M Mawlong kaba la thep ha ka minit ba 51 bad ka Aitibha Thabah ha ka minit ba 56, ki la dei ki nongthep kol jong ka Iasnohktilang.
Watla ka Mawkriah West ka la shah rem noh, hynrei kan sngew sarong pat ïa la ka rukom ïalehkai ha kaba ka la lah ban khanglad ïa ka Umpling haduh palat 50 minit ban ïoh pynkhih jar bad dei tad ha ka minit ba 54, ba ka la shah thep noh shi kol, kaba la wan lyngba ka jingshut penalty, ïa kaba la thep da ka Streamlet Taro na ka bynta ka Umpling.
Ka Mawkriah ha ki ar tylli ki jingïalehkai ba la dep shwa jong kane, ka la shah thep haduh 32 tylli ki kol hynrei ha kane ka jingïakhun, ki la ïalehkai tyngeh ban ïada ïa la ka jong ka kol, ha kaba ki la lah hynrei dei tang ka jingïoh penalty ka Umpling, ba ki la shah thep.
Ki jingïalehkai ban long ha ka sngi Palei pat kan sakhi ïa ki jingïakhun na ka Group A, ha kaba ka PFR Football Academy kan ïakhun pyrshah ïa ka Kick Start Football Coaching Centre ha ka por 2:30 janmiet bad bud pat da ka jingïakhun hapdeng ka Laitkor Sports Club pyrshah ïa ka Lawei Smit Sports Club ha ka por 4:15 janmiet.
