Shillong, Naitung 05:
U Mason Mount uba dei u rangïalehkai pdeng jong ka Chelsea u la pynïasoh noh ïalade sha ka Manchester United hadien ka jingsoi ïa ka kontrak kaba 5 snem.
U Mount u la ong ba ka jinglah jong u Erik ten Hag uba dei u Manager ban pyni ïa ka rukom pynkhreh nadong shadong jong ka Man-chester United, ka la pynlong bad pynkohnguh ïa u ban mih noh na ka Chelsea kaba dei ka club kaba u la ïadon bynta naduh dang khynnah.
Une u rangïalehkai ba dang 24 snem ka rta, un dei ruh u rangïalehkai ba nyngkong ba u Ten Hag un soi ha kane ka ïew ïadie ïathied, ha ka dor kaba long £55m, bad ban kynthup sa £5m ha ka add-ons.
“Hadien ka jingïakynduh bad u manager, bad ha kaba la ïakren ïa ki pynkhreh ki jong u, ngam lah shuh ban ap bad kmen na ka bynta ka samoi ban wan,” la ong u Mount uba dei ruh u rangïalehkai ka England.
“Baroh ki lah ban sakhi ba ka club mynta ka la lah ban kiew shajrong hapoh ka jingïalam jong u Erik ten Hag. Nga dap da ka jingïoh mynsiem kaba khraw, nga tip ruh ba katno kan long kaba kmen ban jop ïa ki nam lahduh ba heh bad kaei kaba donkam ban leh na ka bynta kata,” la ong u Mount.
“Kam long kaba suk ban mih noh na ka Club ha kaba phi la heh la san, hynrei ka Manchester United kan sa ai pat kata ka jingïaleh kaba thymmai na ka bynta ki snem ban wan ha ka jingim ïalehkai ka jong nga,” u la ong.
U Mount, uba la thep haduh 33 tylli ki kol na ki 195 tylli ki jingïalehkai na ka bynta ka Chelsea kata naduh ba u la sdang mih madan ha u snem 2019, u la duh noh ïa kaba bynta ba kut jong ka aiom ba la lah, namar ka jingmynsaw, ha kaba ka Chelsea ruh ka la pyndep ha ka kyrdan kaba 12.
Hadien ka jingwan pynïasoh sha United, une u rangïalehkai un phong ïa ka jersy number 7, kaba la phong da u Cristiano Ronaldo, u David Beckham, uba dei u number ba u Ten Hag u la tyrwa sha u Mount ha ka por ba ïakren, ban pyni ba katno u kwah ïa u.
