Tezpur, Naitung:
Hadien ka jingkhot ïakhih ba la wer da ka Federation of Veterans’ Association (FVA), ka All Assam Federation of Veteran’s Association (AAFVA) ka la bthah ïa baroh ki Districts Federation of Veteran’s Association ban ïashim bynta ha ka jingïakhih da kaba shah thngan kaba shi sngi hakhmat ki DC Office hadien ba ki la ïoh jingbit hashwa.
Ha Sonitpur distrik ha Court Chariali jong ka Tezpur hajan DC Office, ka la don ka jingïakhih da kaba shah thngan ba la pynïaid da ka District President Capt. Indu Medhi bad u Secretary Sub Maj/Lt Tikendra Basumotary.
Ïa kane ka jingïakhih la pynlong da kaba jai jai ha kaba ki la don bun ngut ki Veterans bad ki Veer Naris (JCOs bad ki OR) jong ka Sonitpur District Federation of Veteran’s Association kiba la ïashim bynta.
U State president Sgt Dinesh Mahanta, Chief Coordinator Capt Lohit Chandra Bhuyan, State General Secretary Sub Maj PK Gogoi bad u Assistant Secretary Sub Maj K K Borah jong ka (AAFVA) ruh ki la don bynta ha ka jingshah thngan.
U State President u Sgt Dinesh Mahanta, u la ong ba ki jingdawa ba mynta jong ki shipai ba la shongthait ka long ban kynthup lang shwa ïa kiba don ha ki kyrdan kiba kham hapoh kum ïa ki jawan bad ki heh shipai ha ka jingsiew kaba hap hapoh ka OROP na ka bynta ki Veterans bad ki Veer Naris bad kiba bun kiwei pat.
