Guwahati, Naitung:
Kum shi bynta ban nang pynkhlaiñ shuh shuh ïa ki jngpyntreikam jong ka seng ha Tinsukia distrik lem kiwei ruh ki distrik jong ka jylla, u Vice- President jong ka seng Manoj Dhanowar u la ïashim bynta ha ka jingïalang bad kiwei pat ki dkhot jong ka seng.
Ha ka jingai jingkren ha katei ka jingïalang, u Vice President u la ong ba kane ka long ka dak ka shin kaba paw shabar na ka bynta ka seng bad ki la khmih lynti ba kan sa don ka jingïakhun kaba ïakhaid bha bad ka seng kaba bat ïa ka jingsynshar ka Bharatiya Janata Party (BJP) ha ka jingïakhun ïa ka General Elections ka ban sa wan.
Ha kane ka jingïalang la leit ban ïashim bynta da kiba bun ngut ki nongshong shnong jong ka Hahchara bad Borhapjan jong ka distrik. U dkhot jong ka kynhun ki samla jong ka seng, u Babul Bikash Chetiya ruh u la don bynta ha ka jingïalang bad u la pdiang burom ïa kiwei pat ki dkhot kiba la wan ban ïatreilang bad ka seng.
