Shillong, Naitung 05:
U Bah Donald Steven Wahlang uba ba dei u General Secretary ka Meghalaya Basketball Association (MBA), u la shah jied ban long kum uwei napdeng ki 7 ngut kum u Vice President jong ka synjuk Basketball Federation of India.
Ïa ka risol jingshah jied jong u Bah Donald la pynbna ha ka sngi Balang ban shimti ïa katei ka kam na ka bynta ban pynïaid shakhmat ïa ki kam bad ka jingïalehkai basketball hapoh ka Ri.
Ka Basketball Federation of India, ka la pynlong ïa ka ilekshon jong ka EC na ka bynta ka samoi 2023-2027 ha Jawaharlal Nehru Stadium, New Delhi ha ka 5 tarik mynta u bnai bad kane ka ilekshon la pynlong hapoh ka jingpeit bad pynïaid jong u Administrator ka BFI, u Retd Judge jong ka Delhi High Court u Krishna Bhatt bad u Returning Officer u HS Sharma, uba dei u Retired District and Session Judge ka Delhi.
Ki kam ba la buh, ki long President kawei, Vice President 7 tylli kynthup kawei na ka bynta ka kynthei, kawei ka kam Secretary General, 5 tylli ki kam Joint Secretary, Treasurer kawei bad 11 tylli na ka bynta ki dkhot ka EC.
Ka jingshah jied jong u Bah Donald uba la thep kyrteng ban ïakhun ïa ka kam Vice President, ka la pynlong ruh ïa u ban dei u nong Meghalaya ba nyngkong ban shah jied na ka bynta katei ka kam.
Na ka liang jong ka Meghalaya Basketball Association ka la ai khublei ïa u Bah Donald bad kitbok kitrwiang bad khmih lynti ruh ba nangne shakhmat, lyngba ka jingshah jied ha katei ka kyrdan kaba heh, kan wanrah ka jingkylla bad jingkiew jong kane ka jingïalehkai hapoh ka jylla.
