Imphal, Naitung:
Shi sngi hadien ba ka la weng noh ïa ka jingkhot pakhang surok ha Imphal-Dimapur National Highway (NH-2), ka ïingsah jong u nongïalam jong ka Kuki National Organisation (KNO) bad u nongaiktien u Seilen Haokip kaba don ha Churachandpur distrik jong ka Manipur ka la shah thang.
Ha ka sngi U Blei ka seng KNO bad ka United People’s Front (UPF) ki la pynbna lang ba kin sa weng noh ïa ka jingkhot pakhang surok, kum shi bynta ban pyrkhat halor ka jingshah ktah jur ka rukom im jong ki paidbah jong ka Manipur.
Kumba la ïathuh ki pulit, la ong ba ka lah ban don ka kynhun jong ki runar kaba dei na ka kynhun Kuki-Zomi, ka bym shym la sngewtynnad ne sngewïahap halor ka jingweng noh ïa ka jingkhot pakhang surok, kiba la donkti ha ka jingjia ha ka miet jong ka lah sngi U Blei.
U Haokip ha ka jingïakren bad ki nongthoh khubor u la ong ba ym shym la don briew ha ka ïingsah jong u ha Songpi haba ki runar ki bym shym la lah ban ithuh ki la thang ïa ka ïing jong u.
