The Hague, Naitung:
Ka Netherlands ha ka Sngi Ba-ar, ka la pynbna ba kan khang noh ia ka jingrap mobile phone hapoh ki kamra klas pule. Kane kan long ruh kum shi bynta ban tehlakam ia ka jingshah pynthut bad jingshah teh- shah khum jong ki khynnah pule ha kine ki sngi.
Kumta, ha katei ka sngi ki bor pyniaid ka Netherlands ki la pynbna ba la khang pyrshah ia baroh ki paidbah nongshong shnong jong ka ri ba kim bit shuh ban rah ia ki mobile phone, ki tablet lane ki baja smartwatch hapoh jong ka kamra skul naduh une u snem u ban wan.
ka tnat pule- puthi jong ka Netherlands ruh ka la pynpaw ia ki jingeh bad jingpynthud jong ka mobile phone ha kaba ki khynnah pule kim lah shuh ban pynleit jingmut sha ki jinghikai ba ki nonghikai ki ai hapoh jaka pule.
Namar kane, la ong ba baroh ki tiar kum ki mobile phone, ki tablet bad ki smartwatch kin ym dei shuh ban don hapoh ki kamra skul naduh ka 1 tarik u Kyllalyngkot jong u snem 2024 ban wan.
Kumjuh ruh ka sorkar ka la bthah ia ki bor pyniaid skul ba kin kohnguh ia katei ka jingpyniaid bad ka rai ba thymmai, kum shi bynta ban tehlakam ia ki kam sniew kiba kynrei ha kine ki sngi bad kumjuh ruh ban ailad ia ki khynnah pule ba kin pynleit jingmut ha ka pule- puthi khamtam haba ki don hapoh skul lane ha kano kano ka jaka pule.
U Myntri ka tnat pule- puthi, u Robbert Dijkgraaf haba ai jingkren hapoh ka ïingdorbar thaw aiñ, u la ong ba, u kyrmen skhem ba katei ka rai jong ka sorkar ha kane ka kynti kan iarap ban pynkylla dur ia ka pule- puthi hapoh ka ri bad kan iarap shibun ruh ia ki khynnah pule ba kin lait na ka jingshah teh- shah khum ha kitei ki tiar khamtam ha kum kine ki sngi ba ki khynnah pule ki la kyrni ha ki jingpynbyrngia ba laiphew jait.
