Nongstoiñ, Naitung 06:
Ka lympung ïalehkai District Level Subroto Mukherjee Cup Football Tournament 2023 ba la pynlong da ka shlem treikam District Sports Officer, West Khasi Hills ka la jam sha ka final ha kaba ki hynriew tylli ki kynhun kin pynkhreh ban ïaknieh ïa ka nam lahduh ha ka Sngi Thohdieng ha madan Mawkadiang, West Khasi Hills.
Ha ka jingïakhun semi final jong ka Under-17 ki kynthei kaba la long ha ka Sngi Palei, ka BBC Secondary School Steplanglur ka la pynliem noh da 3-0 kol ïa ka Joel Gatphoh HSS bad ka Sibsingh Govt. Memorial HSS ka la pynliem noh da 1-0 kol ïa ka Christ Disciple’s SS.
Ha ka Under 14 ki shynrang, ka St. Peter’s HSS ka la pynliem noh da 2-0 kol ïa ka Nongstoiñ Public Secondary School bad ka St. Anthony’s SS Jaidoh ka la pynliem noh da 2-1 kol ïa ka Dapboklang Giri SS.
Ha ka Under-17 ki shynrang, ka Sibsingh Govt. Memorial HSS ka la pynliem noh da 3-0 kol ïa ka Joel Gatphoh HSS bad ka Rev.JJM Nichol’s Roy SS ka la pynliem noh da 1-0 kol ïa ka Anderson HSS.
Kumta na ka liang ka shlem trei kam DSO ka pyntip ba ka jingïalehkai final jong kane ka lympung kan long ha ka 7 tarik (Sngi Thohdieng).
