Shillong, Naitung 06:
Ka Laitkor Sports Club bad ka PFR Football Academy ki la lah ban pyntikna ban jam sha ka semi final ha ka Women’s Football League ba la pynïaid da ka Shillong Sports Association.
Kane ka wan urlong hadien ba ka lah ban pynliem noh ïa ka Lawei SC haduh shiteng dorjon kata da 6-0 kol ha ka Sngi Palei ha madan Polo. Lyngba kane kan pynlong ïa ka Laitkor ban ïai bteng ïa ka jingjop kaba saw ha kane ka lympung bad ka Nisilia Majaw ka la khur ïa ka hat-trick.
Kumba ka paw na kane ka jingïakhun baroh ar ki kynhun ki la lah ban ïalehkai bha naduh kaba sdang, hynrei ka Laitkor ka la ïoh ban pynkhih jar nyngkong eh lyngba ka Nisilia ha ka minit kaba 3. Kane ka shi kol ka la nang pynïoh mynsiem ïa kane ka kynhun bad tang hadien 4 minit ka la pynbud biang ïa ka kol ba ar lyngba ka Iaraplang Nongrum na ka bynta ban tam 2-0 kol.
Ka Nisilia ka la pynbud biang ïa ka kol ba ar ha ka minit kaba 20. Hadien shiteng kynta ka Laitkor ka la ïoh ban thep kol biang ha ka minit kaba 36 lyngba ka Ïawanlang Nongbet.
Hadien ba la bteng ïa ka jingïakhun jong ka kylla miet, ki ’thei ïalehkai ka Lawei SC ki la sdang ban ïakhun tyngeh ha kaba ki la ïoh katto katne ki kabu kiba biang, hynrei namar ka jingbym don ïa ki nongthep kol ba kynsai ka la pynlong ïa kane ka kynhun ban duh ei ïa ki kabu ksiar.
Ka Nisilia Majaw ka la khur syndon ïa ka hat-trick hadien ba ïoh thep ïa ka kol balai ha ka minit kaba 46. Ka Laitkor ka la ïoh ban thep ïa ka kol kaba khatduh na ka daw ba ka ’thei apkol ka Lawei ka la kum pyllait ïa ka bol na kti hadien ba ka Solina Jaba ka la ïoh ban shut na jngai ha ka minit kaba 56.
Haba phai sha kawei pat ka jingïakhun kaba la long kham hashwa, ka PFR Academy ka la pynliem noh ïa ka Kick Start Academy da 2-0 kol. Ïa kine kol la thep da ka Ridalin Suting ha ka minit kaba 22 bad ka Elviorika Sohkhlet ha ka minit ba 27.
Kumta ka Laitkor ka la ïoh ban bat ïa ka kyrdan ba hakhlieh duh na ka Group-A da kaba kamai 12 dor-thong (point) na ki saw sien ïakhun bad thep haduh 35 kol, bad kam pat shah thep kol wat tang shisien ruh. Katba ka PFR kaba la wan ba-ar, ka la kamai 12 dor-thong (point) na ki saw sien ïakhun bad thep 29 kol na bynta ban shah thep shi kol na ki saw sien ïakhun.
Ka jingïalehkai ha ka Sngi Thohdieng ha ka Group-B kan long hapdeng ka Synroplang 77 pyrshah ïa ka Lumparing SC ha ka por 2:30 noh phai sngi, katba ka Maw U-Tieng ïa ka Mawlai SC ha ka por 4:15 janmiet.
