Islamabad, Naitung:
U Myntri Rangbahduh barim ka Pakistan, u Imran Khan, ha ka Sngi Balang u la ong ba ki nongshun jong u ki pyrshang ban tynjuh ia u ha kane ka por bad bun ruh kiba la buh thong ban ioh pyniap ia u. Hynrei u la ong ba um don jingsheptieng satia namar um shym la leh ia kano-kano ka jingbakla ha ki por ba la leit.
Ha ka video kaba u Khan u ai jingkren sha ki paidbah napoh ka jaka sah jong u ha Zaman Park jong ka nongbah Lahore ha ka Sngi Balang, u Khan u la ong ba ki don ki nong ai jingtip sha u, kiba iathuh ba don shibun bah ki seng saiñ pyrthei bad ki ‘riew shimet kiba thmu ban shim ia ka jingim jong u bad kitei ki nongshun ki la pynsah marwei bad kerkut ia ka seng Pakistan Tehree- e- Insaf (PTI) ha kane ka por.
Hynrei, u la ong ba namar um shym la leh ia kano- kano ruh ka kam sniew ne ki kam thok- kam shukor ha ki por ba la leit, balei un phet rieh na Pakistan?. Namarkata, u kular ba un iengskhem ha la ka jong ka hok bad u don ka jingngeit kaba skhem ha u blei jong u- u allah.
Namar ha ki por ba u Khan u shah kem, ki bor pyniaid ka Pakistan ki kynnoh ba u Khan bad ki bahaiing- hasem ha ryngkat baroh kiba don jingiadei bad u, ki thmu ban phet bad mih noh na Pakistan khnang ba kin lait na ki jingshah pynshitom bad kin lait na ki kti jong ka aiñ.
Ha u bnai ba la leit, ka sorkar Pakistan ka la khang ia u Imran Khan, ia ka kurim bad ia katto katne ki heh saiñ pyrthei kiba ju ai jingkyrshan ia u, ba kim lah ban mih ne phet rieh shabar jong ka Pakistan bad kane ka long hadien ba u Khan u la shah kem ha ka 9 tarik u Jymmang, ha kaba, ka la mih ka jingiakhih paidbah kaba jur na ki nongkyrshan jong u ha katei ka por.
U Khan, uba long u nongialam ba ha khlieh duh jong ka seng Pakistan Tehreek-e-Insaf (PTI), u la shah ujor bun tylli ki ejahar (FIR) ha kine ki khyndiat por ba la leit bad kaba la kyntiew ia ka jingdon jong ki ejahar kiba la ujor pyrshah ia u sha ka 180 tylli baroh bad haduh kine ki sngi u Khan u la shu bunkam da kaba mareh na kawei ka ïingbishar sha kawei pat namar ki don bun tylli ruh ki ejahar kiba la shu ujor khlem nongrim bad kiba um shym la don bynta eiei ha kitei ki kam sniew ba la pharep ia u.
Kumta ruh u Khan u la ong ba ki nongïasaid aiñ bad ki nongthaw aiñ jong ka seng, ki nongialam ka seng bad ki dkhot jong ka seng baroh lang ki dei ban iakhun ia ka hok jongki ban ujor ejahar kylla pyrshah ia kito ki heh pulit kiba pharep ia u, ia ka iing ka sem bad ia ki nong-ialam bad ki dkhot jong ka seng baroh ha kitei ki ejahar kiba shu thok.
