London, Naitung:
Ki pulit jong ka nongbah London ha ka Sngi Palei ki la iathuh ba kawei ka khynnah ka la khlad bad katto katne ngut pat ki la shu mynsaw hadien ba kawei ka kali ka la leit tynrah ia ka skul ‘Primary’ kaba don ha Southwest London ha katei ka sngi.
Kane ka jia ha ka skul Study Prep jong ki kynthei kaba don hapoh Wimbledon bad ki pulit kim shym la shim ia katei ka jingjia kum ka kam thombor namar la sngewthuh ba ka long tang ka jingbakla jong kiba ñiah ia katei ka kali. Kumta ki pulit ki la bat noh ia u nongñiah bad ia ka briew kaba shong ha katei ka kali ha ka por ba katei ka jingjia ka la jia.
La bat noh ia kitei ki 2 ngut namar ka jingpynkheiñ ia ki aiñ ñiah kali bad ka jingleit tynrah bakla kaba la wanrah ia ka jingiap bad pynmynsaw ruh ia kitei ki khynnah skul kynthei.
Ha ki khyndiat kynta ba la leit, ki bor pahara kiba don ha katei ka thaiñ ki pyntip ba 7 ngut ki khynnah skul kynthei bad 2 ngut ki briew, ki la mynsaw ha katei ka jingjia.
Katkum ka kaiphod ba la ioh lum na ki camera CCTV ba la pyndait ha katei ka jaka ruh la iohi ia katei ka kali ba ka la leit her beit- beit sha katei ka skul bad tynrah na ki bynta dong jong katei ka skul ha kaba kitei ki khynnah ki ïeng ha katei ka por.
Ki pulit, ki kali kit nongpang bad ki kali pynlip ding ki la leit her mar-mar sha katei ka skul tang mar ia ioh jingtip halor katei ka jingjia bad ki briew na ka kynhun iarap ki la ioh ban leh ia kaba donkam baroh ha ka por kaba biang.
Ki nong sakhi bad kumjuh ruh wat da ki lad pathai khubor, ki iathuh ba ka surok kaba poi sha katei ka skul ka long kaba khim haduh katta bad ka long kaba eh ban tehlakam ia ka kali haba la pynher stet hynrei katei ka kali ha katei ka jingjia, wat hapdeng ka jingkhim ka surok ruh ka la pynher beit-beit ban poi sha ka jaka ba ka thmu khlem da lah shuh ban tehlakam bad ka la kum leit tynrah beit- beit ia u dong jong katei ka skul.
Katei ka skul, ka long ka jaka pule kaba pdiang tang ia ki khynnah kynthei kiba naduh ka rta ba 4 snem haduh 11 snem.
U Myntri ka koit ka khiah, u Steve Barclay, u la pynpaw ka jingsngew khia kaba khraw haba iadei bad katei ka jingjia ha katei ka sngi bad u la phah ruh ia ka kyrwoh sngewlem sha ki bahaiing- hasem jong katei ka khynnah ba khlad bad kumjuh ruh sha ki bahaiing jong kito kiba la mynsaw baroh.
